Azərbaycanın telekommunikasiya və poçt sahələrində tənzimləyici qurumu olan İnformasiya Kommunikasiya Texnologiyaları Agentliyi (İKTA) abunəçilərin internet xidmətlərindən istifadəsi ilə bağlı növbəti şikayət indeksi və şikayətlərin orta cavablandırılma müddətinə dair hesabatını dərc edib.
Agentlikdən bildirilib ki, hesabatda 2026-cı ilin I rübü ərzində “E-Şikayət” sistemi vasitəsilə internet operator və provayderlərinə ünvanlanan müraciətlər əsasında formalaşan şikayət indeksi və onun dinamikası əks olunub. Eyni zamanda, cari hesabatda 2025-ci ilin IV rübü ilə müqayisə aparılaraq operator və provayderlər üzrə indeks dəyişiklikləri müəyyən edilib.
Qeyd olunub ki, hesabatda yer alan şikayətlərin orta cavablandırılma müddəti 2026-cı ilin I rübündə “E-Şikayət” sisteminə daxil olan müraciətlərin telekommunikasiya operatorları və provayderləri tərəfindən icra müddətini əhatə edir.
İKTA vurğulayıb ki, şikayət indeksinin və cavablandırılma müddəti üzrə hesabatların hazırlanması ictimai nəzarətin gücləndirilməsi, şəffaflığın artırılması və xidmət keyfiyyətinin yüksəldilməsi baxımından mühüm əhəmiyyət daşıyır. Bu yanaşma telekommunikasiya sektorunda real vəziyyətin müəyyənləşdirilməsinə və tənzimləmə prosesinin daha operativ həyata keçirilməsinə imkan yaradır.
Məlumat üçün bildirək ki, “E-Şikayət” sistemi 2023-cü ilin noyabr ayında istifadəyə verilib. Bu günədək vətəndaşlar tərəfindən sistem vasitəsilə telekommunikasiya və poçt xidmətləri ilə bağlı 12 500-dən artıq müraciət daxil olub.
2024-cü ilin noyabr ayından etibarən isə istifadəçilər “Android” və “iOS” əməliyyat sistemli cihazlar üçün “E-Şikayət” mobil tətbiqini müvafiq olaraq Google Play və App Store platformalarından yükləyə bilirlər. Bu da xidmətin daha əlçatan olmasına və istifadəsinin genişlənməsinə şərait yaradıb.
Agentlik qeyd edib ki, şikayət indeksi və cavablandırılma müddəti ilə bağlı hesabatların hazırlanması davamlı xarakter daşıyacaq və ictimaiyyətə rüblük əsasda təqdim ediləcək. İKTA gələcək fəaliyyətində ictimai iştirakçılıq mexanizmlərindən daha geniş istifadəni strateji prioritetlərdən biri kimi müəyyənləşdirib.
