TƏHLÜKƏSİZLİK

Müasir dövrün başlıca çağırışlarından biri olan kibertəhlükəsizlik sahəsində gənclərin fəal iştirakının əhəmiyyətini xüsusi vurğulamaq lazımdır.

Xeberler.az məlumat verir ki, bu sözləri Azərbaycan Respublikasının Gənclər Fondunun icraçı direktoru vəzifəsini icra edən Qədir Xəlilov aprelin 23-də Bakıda keçirilən Gənclərin Kibertəhlükəsizlik Forumunda çıxışı zamanı söyləyib. O, forumun əhəmiyyətindən danışaraq qeyd edib: “Bu gün biz yalnız müzakirə üçün deyil, eyni zamanda, aktual və vacib bir mövzunu gənclərlə birlikdə dəyərləndirmək üçün buradayıq. Gənclər Fondu olaraq bu cür təşəbbüslərdə sizinlə birlikdə olmaqdan məmnunluq duyuruq”.

Q.Xəlilov forum çərçivəsində kibertəhlükəsizlik mövzusunun müzakirəsinin son dərəcə vacib olduğunu bildirərək bu sahədə gənclərin maarifləndirilməsinin və təşəbbüslərə cəlb olunmasının prioritet istiqamətlərdən biri olduğunu bildirib. O, Azərbaycan Tələbə Gənclər Təşkilatları İttifaqının fəaliyyətini yüksək qiymətləndirib və təşkilatın son dövrlərdə reallaşdırdığı önəmli layihələri nümunə göstərib: “ATGTİ ailəsi artıq cəmiyyətimiz və dünyamız üçün əhəmiyyət daşıyan məsələlərə dair mühüm təşəbbüslərlə çıxış edir. Yaxın zamanda keçirilmiş Quantum Forumu, eləcə də ötən həftə baş tutan “Süni İntellekt və Təhsil” mövzusunda tədbir bu istiqamətdə atılmış uğurlu addımlardandır. Bu gün keçirilən Kibertəhlükəsizlik Forumu da olduqca məqsədəuyğundur. Forumda ölkənin aparıcı ekspertlərinin iştirakı tədbirin həm elmi, həm də praktiki dəyərini daha da artırır”.

Q.Xəlilov Prezident İlham Əliyev tərəfindən həyata keçirilən gənclər siyasətinin ölkədə gənclərin hərtərəfli inkişafına şərait yaratdığını diqqətə çatdırıb. O bildirib ki, bu siyasət çərçivəsində kibertəhlükəsizlik məsələsi də əsas prioritetlərdən biri kimi qəbul olunur: “Sürətlə inkişaf edən rəqəmsal texnologiyalar fonunda kibertəhlükələr də artır və bu baxımdan gənclərin bu sahədə biliklərlə silahlanması, təşəbbüslərə qoşulması və maarifləndirilməsi strateji əhəmiyyət kəsb edir”.

Sonra Qədir Xəlilov forum iştirakçılarına uğurlar arzulayaraq bu kimi təşəbbüslərin davamlı şəkildə həyata keçirilməsinin vacibliyini bir daha vurğulayıb.