TƏDBİRLƏR

“Müasir dövrdə təhsilin rəqəmsal transformasiyası və süni intellekt əsaslı yeniliklər Azərbaycan və Türkiyə arasında aparılan akademik əməkdaşlıqlar çərçivəsində daha da dərinləşir. Bu baxımdan, beynəlxalq hakaton yarışması gənclərin bilik və bacarıqlarının bir laboratoriya şəraitində sınanması üçün nadir imkan yaradıb”.

Xeberler.az məlumat verir ki, bu sözləri Gənclər Fondunun icraçı direktoru vəzifəsini icra edən Qədir Xəlilov Bakıda keçirilən “EduHack 2025: Innovating the Future of Learning” hakatonunda çıxışı zamanı söyləyib.

O qeyd edib ki, gənclərlə bağlı çoxsaylı layihələr həyata keçirilir: “Gənclər Fondu olaraq, biz bu istiqamətdə dəstək verməyə daim hazırıq. Bu layihənin Türkiyə ilə birgə keçirilməsi “bir millət, iki dövlət” fəlsəfəsinin praktiki təzahürüdür. Dost ölkə Türkiyə ilə bu cür layihənin reallaşdırılması, xüsusilə də Avrasiya Universitetinin təşəbbüsü ilə ərsəyə gəlməsi olduqca sevindiricidir. Belə təşəbbüslərin təşkili və icrasında göstərilən dəstək çox önəmlidir”.

Q.Xəlilov vurğulayıb ki, Azərbaycanda son illərdə yaşıl enerji, məşğulluq, rəqəmsal bacarıqlar və digər istiqamətlər üzrə yüzlərlə gənclər layihəsi icra olunub: “Lakin bu tədbir təhsilin gələcəyinə süni intellekt və rəqəmsal yanaşmalar vasitəsilə yeni nəfəs gətirməsi baxımından xüsusilə diqqətəlayiqdir. Bu hakaton nəticəsində ərsəyə gələcək ideyalar artıq 18 saatdan sonra sadəcə layihə olaraq qalmayacaq, onlar Azərbaycanın deyil, bütün dünyanın təhsil sisteminə yeni nəfəs gətirəcək”.

O, çıxışında əlavə edib ki, tədbirdə 10-a yaxın universitetdən gəlmiş tələbələrin iştirakı bu layihənin əhatə dairəsinin və təsir gücünün genişliyini sübut edir: “Tədbirdə iştirak edən parlaq gənclər bizim gələcəyimizdir. Onların ortaya qoyduğu ideyalar – Azərbaycanın, regionun və dünyanın gələcəyi üçün dəyərli sərmayədir”.

Q.Xəlilov layihənin beynəlxalq miqyasda davamlı olmasının, gələcəkdə Türkiyədə də keçiriləcəyinin, ölkədə dövlət başçısının rəhbərliyi ilə həyata keçirilən gənclər siyasətinin bariz nümunəsi olduğunu xüsusi vurğulayıb.