Mətbuat Şurası Ağsaqqal Jurnalistlər Məclisi yaradır

23-09-2010 / 18:12

Mətbuat Şurası qurumun nəzdində Ağsaqqal Jurnalistlər Məclisi yaratmaq qərarına gəlib. Artıq bu gün şuranın iclasında bu barədə yekun qərar da qəbul olub.

Mətbuat Şurasından verilən məlumata görə, Şura sədri Əflatun Amaşov bildirib ki, ömür-gününü milli jurnalistikaya, onun mütərəqqi ənənələrinin davam və inkişafına sərf edən insanların potensialından istifadə vacibdir. Onun sözlərinə görə, Mətbuat Şurası yarandığı gündən onların yanında olub: “Şura onların zəngin təcrübələrinin öyrənilib tətbiqinə, qayğı və problemlərinin həllinə köməyini əsirgəməyib. Bu ənənənin daha da sistemli olmasına çalışırıq və belə bir məclisin yaranmasını zəruri saydıq. Hesab edirik ki, ağsaqqal jurnalistlərin təşkilatlanması mövcud istiqamətdə önəmli həlqələrdən biri olacaq”.

Mətbuat Şurası İdarə Heyətinin üzvü, “Azərbaycan” qəzetinin baş redaktoru Bəxtiyar Sadıqov 135 illik tarixə malik Azərbaycan mətbuatının layiqli ənənələrinin məhz veteran jurnalistlərin simasında yaşandığını deyib. O bildirib ki, ahıl qələm sahibləri mediamızdakı hazırkı problemlərin həllinə öz yaradıcılıq nümunələri ilə töhfələrini verə bilərlər.

MŞ İdarə Heyətinin üzvü, Azərbaycan Respublikasının Prezidenti yanında Kütləvi İnformasiya Vasitələrinin İnkişafına Dövlət Dəstəyi Fondunun icraçı direktoru Vüqar Səfərli də ağsaqqal jurnalistlərin təşkilatlanmasını zəruri sayıb: “Onların özlərinin aktiv ictimai fəaliyyət göstərmələri, bir növ unudulmamaları cəmiyyət üçün də örnəkdir”.

Toplantının sonunda Mətbuat Şurası nəzdində Ağsaqqal Jurnalistlər Məclisinin işlərinin əlaqələndirilməsi və sənədlərin hazırlanması üçün əməkdar jurnalist Yusif Kərimovun başçılığı ilə 7 nəfərdən ibarət qrup yaradılıb.

mənbə: lent.az


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.