"Ötən gün sektorun tənzimləyici qurumu olan İKTA operator və provayderlərlə görüş keçirib. Bununla bağlı məlumatı görəndə ilk ağlıma gələn bu oldu ki, yəqin İKTA tənqidlərdən nəticə çıxarıb və həqiqətən də nəhayət ki, bazarı tənzimləməyə başlayıb".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert bildirib ki, bu nəhənglikdə qurum provayderləri yığıb ki, beynəlxalq reytinqdə qalxmaq üçün internetin sürətini artırmaq lazımdır. Bütün bu görüşün mahiyyəti bundan ibarətdir:
"Doğurdanmı hazırda telekom və internet bazarının diqtə etdiyi çağırışları görə bilmir. 200-dən çox əməkdaşın çalışdığı, xeyli peşəkar insanların da təmsil olunduğu tənzimləyici qurumun bu tip bəsit addımları təəssüf və təəccüb doğurur.
Fərqində deyillər ki, uğurla başa çatan "Onlayn Azərbaycan" layihəsindən sonra Azərbaycanın internet bazarında "internet sürəti" problemi bitib. Ölkədə artıq normal infrastruktur formalaşıb və bazar özü müəyyən edəcək ki kimə hansı sürət lazımdır.
Anlamıram ki, mənasız yerə, tələbat olmadığı halda provayderlərə "yüksək sürətə" keçid tələbi qoymaq, bu tip sürəti dəstəkləməyən modemi olan istifadəçilərə yeni modemlər aldırmaq, vətəndaşları xərcə salmaqla mənasız reytiq ardınca qaçmaq tənzimləyici qurumun nəyinə lazımdır. Bazarda isə həllini gözləyən ciddi problemlər var".
Osman Gündüzün sözlərinə görə, pərakəndə internet bazarında dövlətin xüsusi çəkisi hədsiz yüksəlib, ölkə üzrə nəhəg dövlət telekommunikasiya şəbəkəsi formalaşıb, internetin qiymətlərində seçim imkanları məhdudlaşıb, dövlət provayderləri arasında çıddı təmərküzləşmə gedib, milli domenin tənzimlənməsində ciddi problemlər qalır, qonşu ölkələr 5G sahəsində xeyli irəliləyiblər, biz isə hələ heç tezlikləri müsabiqəyə çıxara bilməmişik, 20 il öncə qəbul edilən Telekommunikasiya haqqında qanun bazarın inkişafını ləngidən bir amilə çevrilib və s:
"İKTA-nın bu tip məsələlərə fokuslanıb, rəqabətli mühitin inkişafına yönəlik addımlar atması sektorun inkişafını daha da sürətləndirə bilərdi.
Amma bütün bunlara baxmayaraq, İKTA-nın o nəhənglikdə komandası bütün səylərini sadəcə beynəlxalq reytinq üçün "sürəti artırmaq" kimi mənasız bir yarışa yönəldiblər".
