E - HÖKUMƏT

Bakı Nəqliyyat Agentliyinin 141 Çağrı Mərkəzinin fəaliyyəti ən son texnoloji yeniliklər nəzərə alınmaqla yenidən qurulur.

Bu gün 141 Çağrı Mərkəzinin alo141.az internet portalının təqdimatı keçirilib.

Xeberler.az-ın məlumatına görə, sayt multifunksional bir portal olaraq, istifadəçilərə Bakı şəhərinin ictimai nəqliyyatından istifadə, eyni zamanda, digər əhəmiyyətli məlumatları təqdim edir.

Sayt 3 dildə - azərbaycan, rus və ingilis dillərində istifadəyə verilib. Əsas menyuda siz, BNA-nın ALO141 Çağrı Mərkəzi haqqında ümumi məlumatla, paytaxtın ictimai nəqliyyat sistemində ən son xəbərlərlə və ən çox soruşulan sualların cavabları ilə tanış ola bilərsiniz.

Hazırda portalda 6 əsas bölmə işlənib hazırlanıb.

Bildirilib ki, gələcəkdə istifadəçilərin də fikirləri və təklifləri nəzərə alınmaqla, digər faydalı bölmələrin də istifadəyə verilməsi nəzərdə tutulur.

Saytda ilk bölmə ”Şikayət və Təkliflər” bölməsidir. Vətəndaşlar BNA-nə bna.az rəsmi internet səhifəsindən birbaşa və ya elektron poçt ünvanımıza məktub göndərməklə, eyni zamanda Facebook sosial şəbəkəsində BNA-nın rəsmi səhifəsinin ismarıc bölməsi və şərhlər vasitəsilə müraciət edə bilirlər.

Bundan əlavə, ALO141 Çağrı Mərkəzinə telefon vasitəsilə olan müraciətlərlə yanaşı, portalda məhz "Şikayət və təkliflər" bölməsi ilə istifadəçilər BNA-nə rəsmi müraciət edə biləcəklər. Bu bölmədə ictimai nəqliyyat ilə bağlı hər növ təklif və ya şikayətləri həftənin 7 günü 24 saat olmaqla ad, soyad, telefon nömrəsi və müraciətin aid olduğu kateqoriyanı seçməklə ünvanlaya bilərlər.

İkinci bölmə, “Necə getməli” (Gediş planı) adlanır. Bu bölmədə, istifadəçilərə səfərlərini əvvəlcədən planlaşdırmaq üçün iki sadə üsul təqdim edilir:

1. Hal-hazırda olduğu ünvanı və gedəcəyi ünvanı qeyd etməklə;

2. A və B nöqtələrini "maus"un sol düyməsi ilə hal-hazırda olduğu və gedəcəyi ünvanın üzərinə daşıyaraq. Burada, hansı məsafəni piyada, hansı avtobusla və ya metronun yaşıl və ya qırmızı xətti ilə gediləcəyi, dayanacaqların sayı, ictimai nəqliyyatda istifadə olunacaq zaman, eyni zamanda istifadəçinin şəxsi minik avtomobili ilə necə getməli olduğu və sərf edəcəyi zaman göstərilir.

Üçüncü bölmə, “Taksi” bölməsidir. Bu bölmədə, hazırda Bakı şəhərində sifarişli taksi xidməti ilə məşğul olan şirkətlər barədə məlumat almaq mümkündür.

Növbəti - dördüncü bölmə isə “Avtobuslar” bölməsidir ki, burada, istənilən marşrutun nömrəsini seçməklə, xəritədə həmin marşrutun getdiyi yolu, əsas dayanacaqları və xəttin uzunluğunu görmək olar.

Bütün bölmələrdə olduğu kimi, burada da xəritə və peykdən görünüş mümkündür. Beşinci bölmə “Nəqliyyat mübadilə mərkəzləri-HAB-lar” ilə bağlıdır.

Bu bölmədə hazırda fəaliyyət göstərən HAB-lar barədə məlumat, həmin HABlara daxil olan və çıxan marşrutların siyahısı və son dayanacağı haqqında məlumat almaq mümkündür.

Eyni zamanda, HAB-da olan marşrutun üzərinə klikləməklə, "Avtobuslar" bölməsinə keçid etmək olar.

Və sonuncu “Yollarda vəziyyət” bölməsidir. Bu bölmədə paytaxt yollarındakı tıxaclar barədə məlumat əldə etmək mümkündür.

Bölmənin xəritəsi Google üzərində yığılıb.

 Günel