İKT üzrə ekspert Osman Gündüz myGov platformasında vətəndaşların fərdi məlumatlarının qorunması ilə bağlı risk yaradan bir mexanizmin qısa müddətlik aktivləşdirildiyini və sonradan aradan qaldırıldığını bildirib.
Xeberler.az bildirir ki, o, bununla bağlı fikirlərini şəxsi Facebook hesabında paylaşıb.
Osman Gündüzün sözlərinə görə, İnnovasiya və Rəqəmsal İnkişaf Agentliyi (İRİA) tərəfindən myGov üzərindən özəl şirkətlərin vətəndaşların fərdi məlumatlarını sorğulaması imkanı iki gün ərzində aktiv edilib. Belə ki, myGov-un “İcazələrin idarə edilməsi” bölməsində əvvəl default olaraq deaktiv olan “məlumat sorğusuna icazə” mexanizmi vətəndaşlardan xəbərsiz şəkildə aktiv vəziyyətə gətirilib.
Ekspert qeyd edib ki, bu yanaşma nəticəsində istənilən şirkət vətəndaşların şəxsi, ailə, iş, biznes və sosial xarakterli məlumatlarını sorğulamaq imkanına malik olub, vətəndaş isə yalnız sorğu göndərildikdən sonra bundan xəbərdar edilib. Halbuki əvvəlki mexanizmdə şirkətlər vətəndaşın əvvəlcədən razılığı olmadan heç bir məlumat sorğusu göndərə bilmirdilər.
Osman Gündüz bu addımı təhlükəli və riskli yanaşma kimi qiymətləndirib. Onun fikrincə, dünya təcrübəsində və rəqəmsal hökumət fəlsəfəsində bu məsələdə “qırmızı xətt” mövcuddur və biznes sorğuları default olaraq bağlı olmalıdır. Razılığın sorğu zamanı deyil, öncədən verilməsinin vacibliyi vurğulanıb. Ekspert bildirib ki, bu yanaşma təkcə beynəlxalq normalarla deyil, Azərbaycan qanunvericiliyi baxımından da ciddi suallar yarada bilərdi.
Xoşbəxtlikdən, məsələ operativ şəkildə həll olunub. Osman Gündüz bildirib ki, son yoxlamalar zamanı İRİA tərəfindən problemin aradan qaldırıldığı və şirkətlərin vətəndaşlara sorğu göndərmək imkanlarının yenidən deaktiv edildiyi məlum olub. Onun ehtimalına görə, təhlükəsizliyə cavabdeh qurumlar da bu vəziyyətdən xəbərdar olaraq müdaxilə ediblər.
Ekspert vurğulayıb ki, bu cür eksperimentlər ciddi dövlət rəqəmsal resursları üçün yolverilməzdir. Son dövrlər faydalı platformaya çevrilən myGov-da riskli qərarların qəbul edilməsi ümumilikdə dövlət sistemlərinə olan ictimai etimadı zəiflədə bilər.
Osman Gündüz sonda qeyd edib ki, belə halların təkrarlanmaması üçün məsul qurum olan Rəqəmsal İnkişaf və Nəqliyyat Nazirliyi (RİNN) və digər aidiyyəti dövlət strukturları tərəfindən zəruri tədbirlərin görülməsi vacibdir.
