AZNET

Gələn il Naxçıvanda 120 min internet istifadəçisi 1 Gbps tutumlu internetə çıxış imkanı əldə edəcək. İnternetin qiyməti aşağı düşəcək.

 Xeberler.az xəbər verir ki, bu barədə Naxçıvan televiziyasının “Üzbəüz” proqramında Naxçıvan Muxtar Respublikası Rəqəmsal İnkişaf və Nəqliyyat nazirinin müavini Rahid Ələkbərli bildirib.

Qeyd olunub ki, hazırda Türkiyə sərhəddindən Zəngəzur dəhlizinin şimal koridoru üzrə magistral fiber optik xəttin çəkilişi Ordubaddan Şahbuz istiqamətində dağlarla aparılır. 135 km-lik xəttin 127 km-lik hissəsinin çəkilişi istiqamətində layihələndirmə işləri başa çatdırılıb. Bu xətt Zəngəzur dəhlizinə ən yaxın şimal və cənub dəhlizlərini birləşdirməklə yanaşı, eyni zamanda Ordubad və Şahbuz rayonunun rəqəmsal infrastrukruna altenativlik qazandıracaq. Bu xəttin informasiya daşıma tutumu saniyədə 300 Terabit olacaq. Eyni zamanda Şahbuz-Sədərək istiqamətli 140 km-lik magistral fiber optik xəttin də çəkilişi aparılır.

Rahid Ələkbərli bildirib ki, 2024-cü ilin aprel ayının sonuna Naxçıvanda internetin keyfiyyəti və qiymətində yeniliklər olacaq. Yeni texnologiyalar əsasında gələn il 120 min internet istifadəçisinə 1 Gbps tutum çatdırılacaq.

Gələn ilin sonunda istifadəyə verilməsi nəzərdə tutulan DATA mərkəzində telekommunikasiya xidmətləri göstəriləcək, yüksək sürətli server və yaddaş qurğularının tikinti-quraşdırma prosesləri həyata keçiriləcək. Mərkəzdə texnoloji inkişafın möhkəmləndirilməsi istiqamətində 3 laboratoriyanın qurulması və texnoloji araşdırma və tədqiqat fəaliyyəti təşkil ediləcəkdir.

Qeyd edək ki, bütün bu rəqəmsal layihələr Azərbaycan Respublikasının Prezidenti İlham Əliyevin imzaladığı “Naxçıvan Muxtar Respublikasının sosial-iqtisadi inkişafına dair 2023-2027-ci illər üçün Dövlət Proqramı” əsasında həyata keçiriləcək.