TƏDBİRLƏR

Bu gün iqtisadiyyat artıq innovativlik səviyyəsindən asılıdır. Ölkələrin gücü bununla ölçülür. Azərbaycan da inkişaf yolunu buna əsaslanaraq müəyyənləşdirib.

Bu sözləri rəqəmsal inkişaf və nəqliyyat nazirinin müavini Samir Məmmədov “İstedadlı Gənclər üçün Təqaüd Proqramı” layihəsinin bağlanış mərasimində deyib.

O bildirib ki, Prezident İlham Əliyevin müəyyən etdiyi "Azərbaycan 2030: sosial-iqtisadi inkişafa dair Milli Prioritetlər”ə əsasən ölkəmizdə güclü insan kapitalı və müasir innovasiya məkanı formalaşdırmalıyıq: “Ümumiyyətlə, innovativ cəmiyyətin qurulmasında ən mühüm amil insan kapitalıdır. Yəni ixtisaslı insan resurslarımız olmasa, biz bu prosesdə uğur qazana bilməyəcəyik. Bu məqsədlə növbəti əməkdaşlığımızı “ROOF Academic Training”lə qurduq.

Nəticə etibarilə İnnovasiya və Rəqəmsal İnkişaf Agentliyi və "ROOF Academic Training" tərəfindən həyata keçirilən təqaüd proqramı yüksək akademik potensialı olan gənclərin dünya üzrə yüksək reytinqli universitetlərə müraciət etmələrinə dəstək olduq. Proqram universitetlərə hazırlıq və müraciət prosesi üçün lazım olan xərcləri əhatə edir”.

S.Məmmədov qeyd edib ki, aztəminatlı ailələrdən olan yüksək potensiallı gənclər üçün nəzərdə tutulan bu təqaüd proqramı 10 istedadlı azərbaycanlı tələbəyə dünyanın nüfuzlu ali təhsil müəssisələri tərəfindən təklif olunan və beynəlxalq səviyyədə tanınan keyfiyyətli təhsil almaqda kömək edib. Bu tələbələr öz təhsillərini "MIT", "Johns Hopkins", "Warwick", "NYU”, "University PSL", “KAIST” kimi dünya reytinqində ən nüfuzlu yerlərdə qərarlaşan universitetlərdə davam etdirəcəklər.

O vurğulayıb ki, proqram üzrə ildən-ilə təqaüdçülərin sayında artım müşahidə olunur: “2021-ci ildə 618 təqaüdçü ilə başlayan proqrama 2023-cü ildə 3500-dən artıq tələbə qəbul edilib, müraciət edən tələbə sayı isə 12 mini ötüb. Qeyd etmək vacibdir ki, regionlar üzrə 732 tələbə bu təqaüddən yararlanıb. Həmçinin 2022-2023-cü illərdə ümumi təqaüdçülərin 43 faizi qadınlardır, qızlar üçün bir neçə xüsusi proqram ilə bölgələrdə fəaliyyət davam etdirilir. Prezident İlham Əliyev də fevral ayında Azərbaycan gəncləri ilə görüşündə bu məqama xüsusi diqqət yetirərək qeyd etdi ki, "Biz insan resurslarımızı hazırlamalıyıq". (Azərtac)

“Ehtimal etmək çətin deyil ki, gələcəyin peşələri birmənalı olaraq texnologiya ilə bağlıdır. Bu məqsədlə layihə çərçivəsində proqramlaşdırma, dizayn və kibertəhlükəsizlik ixtisasları üzrə kadrlar hazırlayırıq. Gənclərin gözləntiləri də bizim məqsədimizlə üst-üstə düşür: layihənin sonunda əmək bazarına onun tələblərinə uyğun çıxmaq və iş tapmaq. Onu da qeyd edim ki, məzunların hazırda 83 faizi işlə təmin olunub”,- deyə Samir Məmmədov diqqətə çatdırıb.