Azərbaycan İnternet Formunun Prezidenti, ekspert Osman Gündüz ASAN Xidmətin tabeliyində fəaliyyət göstərən “İnnovasiyalar Mərkəzi” tərəfindən süni intellekt əsaslı yeni layihə ilə bağlı tender elan edilməsini dəyərləndirib.
Xeberler.az bildirir ki, onun sözlərinə görə, tender süni intellekt əsaslı Səsli Agentin və zənglərin AI əsaslı təhlili platformasının qurulması və tətbiqini nəzərdə tutur:
"Layihə çərçivəsində ASAN-ın çağrı mərkəzinə daxil olan vətəndaş müraciətlərinin avtomatik cavablandırılması, zənglərin mətnə çevrilərək analitik təhlil edilməsi və bu proseslərin mövcud sistemlərlə inteqrasiya olunmuş şəkildə həyata keçirilməsi planlaşdırılır. Tender üzrə ehtimal olunan qiymət 1,2 milyon manat təşkil edir".
Osman Gündüz qeyd edib ki, bu addım faydalı və zəruridir və ASAN tərəfindən bu istiqamətdə artıq uzun müddətdir hazırlıq işlərinin aparıldığı bildirilirdi. Onun fikrincə, elan olunan tender dövlət sektorunda süni intellektin artıq konseptual müzakirə mərhələsindən çıxaraq real xidmət səviyyəsində tətbiqinə keçdiyini göstərir.
Ekspert xatırladıb ki, bu ilk nümunə deyil. Son illərdə İqtisadiyyat Nazirliyi, DOST və digər dövlət qurumları oxşar məzmunlu tenderlər keçirib, bəzi qurumlar isə daxili resurslar hesabına AI əsaslı çağrı mərkəzi həlləri qurmağa başlayıblar. Eyni zamanda ABB, Azercell və digər özəl qurumlarda da bu tip texnologiyaların tətbiq olunduğunu bildirib.
Onun sözlərinə görə, AI əsaslı çağrı mərkəzləri vətəndaş müraciətlərinə daha sürətli cavab verilməsinə, operatorların iş yükünün azaldılmasına, xidmət keyfiyyətinin ölçülməsinə və problemlərin analitik əsaslarla aşkarlanmasına imkan yaradır. Tenderin texniki tələblərində mənbə kodunun, modelin və datanın ötürülməsinin nəzərdə tutulması da müsbət məqam kimi qiymətləndirilib.
Bununla yanaşı, Osman Gündüz qeyd edib ki, əsas məsələ bu proseslərin daha səmərəli və koordinasiyalı şəkildə həyata keçirilməsidir.
Onun fikrincə, dövlət qurumları üçün ortaq olan bəzi AI modullarının mərkəzləşdirilmiş şəkildə əldə edilməsi və vahid dövlət platforması üzərindən təqdim olunması həm maliyyə, həm də texnoloji baxımdan daha məqsədəuyğun olardı. Bu yanaşma vahid dövlət süni intellekt infrastrukturunun formalaşmasına, Azərbaycan dili üzrə səs datalarının mərkəzləşdirilmiş toplanmasına və təhlükəsizlik risklərinin azaldılmasına töhfə verə bilər.
Ekspert yekunda bildirib ki, dövlət xidmətlərinin süni intellekt əsasında təqdim edilməsi və müraciətlər üzrə analitik təhlillərin aparılması mühüm və təqdirəlayiq addımdır. Əsas məqsəd bu təşəbbüslərin vahid strategiya və koordinasiya çərçivəsində davam etdirilməsidir.
