SOSİAL MEDIA

Azərbaycanda demək olar ki, əksər universitetlərin saytları mövcuddur. Bu saytlarda universitetin keçirdiyi tədbirlər, seminarlar, iclaslar və s. barədə informasiya yerləşdirilir.

Xeberler.az azedu.az-a istinadən bildirir ki, hər bir abituriyent qəbul olunacağı universitet haqqında geniş məlumat almaq, onun saytına baxaraq gələcək ali məktəbinə kiçik bir virtual səyahət etmək istəyər.

Bəs abituriyent və tələbələr universitetlərin saytlarına daxil olduqda istədikləri məlumatı əldə edə bilirlərmi? Bu saytlarda nələr çatışmır? Hansı yeniliklər olmalıdır?

Mövzu ilə bağlı AzEdu.az-a açıqlamasında təhsil eksperti Adil Vəliyev universitetlərin saytları barədə öz fikirlərini bölüşüb:

“Bəzi universitetlərimizin saytlarına abituriyent, tələbə yaxud valideyin gözü ilə baxanda istədiyimiz məlumatları əldə edə bilmirik. Bəzən isə lazımlı məlumatları saytın elə bir hissəsində yerləşdirirlər ki, heç görünmür. Sayt yaradarkən fikir verilməli məqamlardan biri universitetlərin əsas müştərisi olan abituriyentləri hər baxımdan nəzərə almaqdır. Burada ixtisaslar, fakültələr, hətta ixtisaslarda hansı fənlərin tədris olunduğu barədə qısa məlumatlar paylaşıla bilər. Seçdikləri ixtisası bitirdikdən sonra harada işləyə biləcəkləri haqda məlumat olması da vacibdir. Bu həm abituriyentlər həm də, tələbələr üçün lazımlı informasiyadır. İxtisas seçimində onlara  xeyli yardımcı ola bilər. Tələbələr isə qəbul olunduqları ixtisası dəyişmək, başqa bir universitetə transfer olmaq istədiklərində sayta baxaraq fikirlərini dəqiqləşdirə bilərlər”.

Ekspert universitet saytlarında çatışmayan cəhətləri qeyd edib və öz təkliflərini irəli sürüb:

“Universitetin beynəlxalq əlaqələri, hansı xarici universitetlərlə nə kimi əməkdaşlıqları olduğu və hansı beynəlxalq proqramlara qoşulduqları barədə məlumatları saytlarında yerləşdirməlidir. Həmçinin, mütləq şəkildə maddi-texniki bazaları haqqında məlumat olmalıdır ki, tələbələr “informasiya təhlükəsizliyi”, “kompüter mühəndisliyi”, “mexanika mühəndisliyi” və s. kimi ixtisasları seçəndə qəbul olunduqları universitetin maddi-texniki bazasının bu dərsləri keçməyə imkanı olub-olmadığı barədə bilgili olsunlar.

Düşünürəm ki, saytlarda hesabat bölməsi də olmaladır. Universitetlə maraqlananlar üçün bu informasiyanın əlçatan olması məqsədəuyğundur. Orada qeyd edilə bilər ki, məzun olan neçə nəfər var, hazırda məzunlardan neçəsi ixtisası üzrə işləyir, onlardan neçə nəfəri işlə təmin olunub və s. Bu başlıqlarla məlumatların verilməsinə ehtiyac var.

Həmçinin, universitet tələbələrin sosial həyatı barəsində də bir pəncərə açmalıdır. Çünki, tələbələr təhsil aldıqları müddətdə onlara sosial aktivitələr lazımdır. Abituriyentlər universitetlərlə maraqlanarkən tələbəliyin yalnız səhərdən axşama kimi oxumaq olmadığını, universitetin dərsdən əlavə maraqlı sosial həyatının da olduğunu görməlidir”- deyə, o fikirlərini tamamlayıb.