TƏHLİL VƏ RƏYLƏR

"Düşünürəm ki, indiki məqamda polisin bu formada sərt yanaşmasına elə də lüzum yox idi. Xüsusən də etirazçıların bir dövlət qurumu tərəfindən qəbul ediləndən sonra digər bir dövlət qurumu tərəfindən bu formada davranışın sərgilənməsi bir qədər anlaşılan deyil.

Tələbələr haqlıdırlarmı?

Bu semestr tələbələr, hibrid formada, yəni əyani-distant, onlayn formada təhsil alıb. Hansı ki, tələbə-Universitet müqaviləsində bu forma əyani olaraq nəzərdə tutulub.
Bu formada təhsilin hüquqi əsasları qabaqcadan mövcud olmayıb. Buna baxmayaraq bəzi universitetlərdə bu formada tədris, yetərincə hazırlıq olduğundan çox uğurlu, yüksək səviyyədə alınıb, bəzilərində isə, gizli deyil ki formal xarakter daşıyıb. Formallıq da Universitetin bu situasiyaya hazırlıqsız olması və ya tələbənin evində yetərli texnoloji-tədris şəraitinin olmaması ilə bağlı olub.

Yaranmış bu situasiya üçün tələbələr günahkar olmayıb. Bu baxımdan hüquqi çərçivədə tələbələr haqlı görünür. Amma bir daha vurğulayiram ki, bir sıra universitetlər və müəllimlər çətinliklə olsa da tələbələrə onlayn mühitdə bilik , istiqamət verməyə çalışıb.

Məhz bu cür şərait yarandığından hökumət həssas qrupa daxil olan bu tip tələbələrin təhsil haqqını ödəmək üçün 40 milyon vəsait ayırıb.

Bəs digər tələbələr necə olmalıdır?

Düşünürəm ki, bu tələblərin təhsil haqları, ən azı bu vəsaitin bir hissəsi , hansısa formada Universitetlər tərəfindən həll oluna bilər. Bildiyim qədər Təhil Nazirliyi, Universitetlər tələbələrə bir xeyli ciddi güzəştlər ediblər. Təhsil haqqı ilə bağlı da bu cür addımın atılması məntiqli olardı.

Fikrimcə, pandemiya dövründə əyani-distant və distant təhsil forması ilə bağlı hökumətin yetərli huquqi mühiti olmadığından bu problemin həlli istiqamətində hökumət tərəfindən universitetlərə və tələbələrə dəstək üçün əlavə addımların atılması da doğru olardı.

İmtahanların tam ləğvi tələbi isə, fikrimcə doğru yanaşma deyil. Bu, ümumiyyətlə həm Universitetin nüfuz məsələsi olmaqla bərabər, həm də imtahan ənənəsini də pozmaq doğru olmazdı. Sadəcə bu imtahanlarda daha yumşaq yanaşma sərgiləmək doğru olardı".