E - HÖKUMƏT

Ölkəmizdə elektron istintaq sisteminin tətbiqinin vaxtıdır.

Bunu jurnalistlərə açıqlamasında Vəkillər Kollegiyasının sədri Anar Bağırov deyib.

A.Bağırov bildirib ki, ölkə başçısının 2018-ci ildə imzaladığı Azərbaycan Respublikasında vəkilliyin inkişafı ilə bağlı əlavə tədbirlər haqqında Sərəncamında elektron vəkillik sisteminin yaradılması və onun elektron məhkəməyə inteqrasiyası barədə müvafiq tapşırıqlar verilib: "Çox təəssüf ki, həmin işlər tam yekunlaşmayıb. Biz tam əminliklə deyə bilmərik ki, elektron vəkillik sistemi elektron məhkəmə sisteminə tam inteqrasiya olunub. Burada bir çox problemlər, çətinliklər var.

Vəkillər Kollegiyası olaraq çalışırıq ki, bütün vəkillik xidmətləri o cümlədən sənədləşmə, kargüzarlıq elektron qaydada aparılsın. Hazırda əsas hədəflərimizdən biri elektron vəkil orderinin tətbiq edilməsidir. Bunun üçün elektron məhkəmə sistemi işə tam hazır olmalıdır. Bununla yanaşı, ölkəmizdə elektron istintaq sisteminin tətbiqinin vaxtıdır. Elektron istintaq, elektron məhkəmə, elektron vəkillik və elektron hökumət - bunlar vəhdət şəklində bir yerdə səmərəli fəaliyyət göstərə bilərlər. Elektron orderi mütləq ki, gələcəkdə elektron məhkəməyə tətbiq edə biləcəyik. Lakin elektron istintaq olmadığına görə yenə kağız daşıyıcılardan istifadə etməli olacağıq. Müəyyən hallarda elektron məhkəmə sistemində çatışmazlıqlar olur. Vəkillər haqlı olaraq narazılıq bildirirlər. Çox arzulayırıq ki, narazılıqlar aradan qalxsın. Bu baxımdan sistemlərin daha da inkişafı, tətbiqi və inteqrasiyası həm dövlətin, həm də cəmiyyətin maraqlarına xidmət göstərəcək və vəkillərimiz da bundan faydalana biləcəklər". (Azərtac)