TƏHLÜKƏSİZLİK

Son zamanlarda döyüş bölgəsində baş verən hadisələrlə bağlı Azərbaycanın informasiya cəbhəsi də diqqət mərkəzindədir.

Sosial mediada aktivlik kifayət qədər yüksəlib, bütün internet media qurumları gücləndirilmiş iş rejmində çalışırlar.

Müşahidələrimiz göstərir ki, milli internet resurslara hücumlar artıb, sosial şəbəkələrdə saxta profillərin də aktivliyi müşahidə olunur, doğru olmayan məlumatların paylaşılması kimi hallara rast gəlinir.

Sosial media istifadçiləri bəzən Azərbaycan dilli olmasına baxmayaq Ermənistan tərəfin maraqları tirajlayan, paylaşan profillərə və Facebook səhifələrinə rast gəldiklərini də bildirirlər.

Azərbaycan İnternet Forumunun rəhbəri Osman Gündüz bu məsələlərlə və mövcud problemin həlli ilə bağlı Xeberler.az-a ətraflı məlumat verib.

 O bildirib ki, müəyyən gərginliklər olsa da, ölkənin informasiya mühitində elə də ciddi fəsadlar olmayıb. Yalnız bir - iki internet resursumuzun fəaliyyətində qısa müddətli dayanma olub.

AİF prezidenti İT mütəxəssislərə və internet istifadəçilərinə, internet media qurumlarının rəhbərlərinə müraciət edərək ehtiyatlı olmağa çağırıb:

“Son dövrlərdə yaranmış situasiya ilə bağlı düşmən tərəf kiber hücumları da gücləndirib. Ayrı-ayrı internet resurslarımıza, xəbər saytlarına, dövlət qurumlarının saytlarına hücumlar təşkil olunur. Bu kimi halların güclənəcəyini də gözləmək olar .

Osman Gündüz son vaxtlar Azərbaycan dilli saxta Facebook səhifələrinin də arta biləcəyini istisna etməyib:

“Əsas mübarizə meydanlarından biri də Facebook-dur. Güman ki, Ermənistan kəşfiyyatı tərəfindən məlumat əldə edilməsi, dezinformasiya yaymaq məqsədilə saxta Azərbaycan profilləri, Azərbaycan dilli Facebook səhifələr yaradılır. Və bununla da Ermənistan tərəfin maraqlarına xidmət edən informasiyalar yaymağa çalışırlar. Bu cür hallarla rastlaşdıqda ehtiyatlı və diqqətli olmaq, tanınmayan, şübhəli profillərə ehtiyatla yanaşmaq, şübhəli linkləri, qruplarda gələn videoları və məktubları açmamaq, şübhəli saytlara daxil olmamaq lazımdır”.

AİF rəhbəri bildirib ki, bu aralarda hər bir istifadəçinin elementar informasiya təhlükəsizliyi qaydalarına daha ciddi əməl etməsi arzuolunandır.

Osman Gündüz eyni zamanda İT və informasiya təhlükəsiziliyi üzrə mütəxəssislərə müraciət edərək internetdə və sosial mediada yarana biləcək informasiya təhlükəsizliyi problemləri ilə bağlı sadə istifadəçilərə və internet media qurumlarına köməklik göstərməyə çağırıb.

 Məltəm Talıbzadə