RƏQƏMSAL DÜNYA

Dünən Bakıda Prezident yanında Vətəndaşlara Xidmət və Sosial İnnovasiyalar üzrə Dövlət Agentliyinin tabeliyindəki “Elektron Hökumətin İnkişafı Mərkəzi”nin inzibati binasının - “ASAN 2.0”ın açılışı olub.

Ümumiyyətlə "ASAN 2.0"ın konsepsiyası nədən ibarətdir?

Əvvələr vətəndaşlar “ASAN xidmət” mərkəzlərində hansısa xidmətdən istifadə etmək üçün mərkəzə 2 dəfə müraciət edirdilər. Birinci dəfə öz müraciətlərini vermək üçün, ikinci dəfə isə sənədlərini götürmək üçün mərkəzlərə gəlirdilər. İndi bu konsepsiyaya əsasən vətəndaşlar elektron sistemdən istifadə edəcəklər. Onlar öz şəxsi kabinetləri və portal vasitəsi ilə müraciət edəcəklər və yalnız sənədlərini götürmək üçün “ASAN xidmət” mərkəzlərinə yaxınlaşacaqlar. Bu həm vətəndaşların vaxt itkisini, həm də xərclərinin qarşısını alacaq. Sistemin digər dövlət orqanlarının sistemləri ilə əlaqələndirilməsi isə vətəndaşların xidmətlərə müraciət zamanı təqdim etdikləri sənədlərin sayını əhəmiyyətlə dərəcədə azaldacaq.

Xeberler.az  bildirir ki, Azərbaycan İnternet Forumunun prezidenti Osman Gündüz də məsələyə münasibət bildirib: 

“Əminəm ki, haqqında xeyli əvvəllərdən söhbət gedən “ASAN 2.0” bu mərkəzdən uğurla gerçəkləşəcək".

Mərkəzin açılışı ilə bağlı olaraq “Elektron Hökumətin İnkişafı Mərkəzi” publik hüquqi şəxsin direktoru Fariz Cəfərov yerli mətbuata müsahibəsində vurğulayıb ki, mərkəz ölkədə elektron hökumət sahəsində siyasətin icrasını həyata keçirir:

"Mərkəzin binasında vətəndaşa birbaşa xidmət olmayacaq, vətəndaşlar xidməti E-gov.az portalı vasitəsilə alacaqlar. Mərkəz həftənin 7 günü, günün 24 saatı fasiləsiz olaraq vətəndaşlara xidmət göstərəcək".