TƏDBİRLƏR

Oktyabrın 18-də ADA Universitetində “Azərkosmos” ASC, ADA Universiteti, ABŞ-ın Azərbaycandakı səfirliyinin təşkilatçılığı, Aeronavtika və Kosmik Tədqiqatlar Milli Agentliyinin (NASA) tərəfdaşlığı ilə Azərbaycanda ilk dəfə dünyanın ən böyük hackathonu – “NASA Space Apps Challenge”in açılış mərasimi keçirilib.

Xeberler.az bildirir ki, tədbirdə ADA Universitetinin rektoru, səfir Hafiz Paşayev, akademik Roald Saqdeyev və “AzərKosmos” ASC-nin sədri Rəşad Nəbiyev çıxış ediblər.

“NASA Space Apps Challenge” hackathonu zamanı iştirakçılar – tələbələr və hackathon həvəskarları 2 gün ərzində verilən tapşırıq əsasında məhsul təqdim etmək üçün bir araya gələcəklər. Yarış iştirakçıları təcrübə və biliklərini digərləri ilə bölüşməklə yanaşı, “NASA Space Apps Challenge” hackathonu çərçivəsində innovativ məhsul yaratmaq imkanı əldə edəcəklər.

Müsabiqədə qalib komanda üçün mükafat 10 min manat nəzərdə tutulur. İkinci yerin sahibi 5 min manat, üçüncü yerdə qərarlaşan komanda isə 2500 manat mükafat qazanacaq.

“NASA Space Apps Challenge” Yer və kosmosu anlamaq təcrübəsi əldə edərək, həmfikir komanda yoldaşını tapmaq və hacking bacarıqlarını nümayiş etdirmək üçün yaxşı bir fürsətdir. İştirakçılar əhatələrini genişləndirmək, mentorlardan və mütəxəssislərdən, eləcə də bir-birindən öyrənmək şansı əldə edəcəklər.

Xatırladaq ki, hackathon ortaq fikrə sahib insanların müəyyən müddət ərzində, komanda işi halında eyni mühitdə innovativ fikirlərini kodlaşdırdıqları müsabiqələrə verilən addır. Layihənin ilk sətir və son sətir kodu da o mühitdə yazılmalıdır. Ən sadə dillə desək, bu müsabiqə, bir fikrin beyin fırtınası ilə birləşib qısa müddət ərzində kodlaşdırılmasıdır.