TƏDBİRLƏR

Bakıda “İnformasiya əsrində milli təhlükəsizlik: İnformasiya Kommunikasiya Texnologiyalarına əsaslanan təhlükəsizlik mülahizələri” adlı beynəlxalq konfrans keçirilir.

Xəbərlər-in məlumatına görə, tədbir Azərbaycan Xarici İşlər Nazirliyinin dəstəyi ilə həyata keçirilir.

 Xarici İşlər, Milli Təhlükəsizlik, Ədliyyə və Rabitə və Yüksək Texnologiyalar Nazirliyi ilə birlikdə həyata keçirilən “Azərbaycanda kibercinayətkarlıqla mübarizə və onun qarşısının alınması” layihəsi çərçivəsində baş tutur. Tədbirin məqsədi hökumət, özəl, qeyri-kommersiya təşkilatları daxilində kibertəhlükəsizlik sahəsində yeni nailiyyətlərlə bağlı ümumi məlumatlılığın artırılması və beynəlxalq əməkdaşlıqdır. 

Konfransda Azərbaycandakı 30 dövlət və özəl təşkilatlardan 80-dən çox nümayəndə, o cümlədən kibertəhlükəsizlik üzrə beynəlxalq ekspertlər iştirak edir.

Moderatorluğunu ADA Universitetinin prorektoru Fariz İsmayılzadənin etdiyi konfransda ATƏT-in Bakıdakı layihə əlaqələndiricisi Aleksis Şahtaxtinski, ABŞ-ın Azərbaycandakı səfiri Robert Sekuta, XİN-in Beynəlxalq Təhlükəsizlik İdarəsinin rəisi Qaya Məmmədov, Türkiyənin Azərbaycandakı səfiri İsmayıl Alper Coşkun və Estoniyanın Azərbaycandakı müvəqqəti işlər vəkili Jaap Ora çıxış edib. Çıxışlar zamanı kibertəhükəsizliyin təmin olunmasında beynəlxalq əməkdaşlığın vacibliyi, Azərbaycanın bu sahədə əldə etdiyi nailiyyətlər və dünyanın qarşılaşdığı kibertəhdidlər barədə danışılıb. Daha sonra tədbir panel çıxışları ilə davam etdirilib.

 Xatırladaq ki, tədbir ATƏT-in layihə əlaqələndiricisinin Azərbaycanda kibercinayətkarlığın qarşısının alınması və onunla mübarizə üzrə həyata keçirdiyi layihənin bir hissəsidir. 

Konfrans 2 gün davam edəcək. 

Tədbir ADA Universitetində təşkil olunub. 

Məltəm Talıbzadə