İNNOVASİYA VƏ STARTAP

Məlumat verdiyimiz kimi, bu il də Azərbaycanda regionun ən böyük informasiya-texnologiyaları sərgi-konfransı Bakutel keçiriləcək.

Noyabrın 29-da açılış mərasimi baş tutacaq sərgiyə hazırlıq işləri görülür.

Qeyd edək ki, sərgi Iteca Caspian şirkəti  tərəfindən təşkil edilir və dekabrın 2-nə qədər davam edəcək.

Bir müddət əvvəl məlumat vermişdik ki , bu il Azərbaycan startapları üçün sərgidə geniş yer ayrılacaq.

Qeyd edildi ki, startapçılar öz layihələrini iştirakçılara təqdim edə biləcək.

Caspian şirkətinin layihə rəhbəri  Zivər Məmmədova  Xeberler.az-a bildirib ki, bu il şirkət Rabitə və Yüksək Texnologiyalar Nazirliyi ilə birgə startapların sərgidə geniş təmsil edilməsi üçün xüsusi işlər görür.

Onun sözlərinə görə, bu məsələ diqqətdədir və  hazırlıq işləri başa çatdıqdan sonra  ictimaiyyətə ətraflı məlumat veriləcək.

Zivər Məmmədova  deyib ki, Bakutel sərgisini şirkətlər və iştirakçılar faydalı etməyə çalışırlar, bunun üçün də yeni ideyalara açıqdırlar.

O, sərgidə işirak etmək istəyən startapçılara da müraciət edib:

“ Bu il startaplar üçün xüsusi tədbirlər planı nəzərdə tutulur. Yeni ideyası, məhsulu, layihəsi olan şəxslər sərgidə iştirakla bağlı şirkətimizə müraciət edə bilər. Biz həmişə yeni ideyalara dəstək veririk. Onlar bizə müraciət etsinlər, sonra bu məsələ ilə bağlı görüş təşkil edib, müzakirələr aparmaq  olar”.

Qeyd edək ki, bu il sərgidə bir çox yeniliklərin olacağı gözlənilir.

Xatırladaq ki, ötən il məşhur Google şirkəti də sərgidə iştirak etmişdi. Bu il isə Dell şirkətinin ilk dəfə sərgiyə qatılacağı gözlənilir.

Bununla yanaşı, yeni məhsullar-sərgi çərçivəsində “Gözdən əlil uşaqlar üçün səsli kitabxana”, “Muzeylərin rəqəmsamlaşdırlması” layihələrinin təqdimatı baş tutacaq.

Eyni zamanda, sərgi çoxsaylı konfrans və forumlarla müşayət olunacaq. 

Sərgi-konfransın iş günləri ərzində “Azərbaycan Respublikasının Rabitə və Yüksək Texnologiyalar Nazirliyi ilə Rusiya Federasiyasının Rabitə və Kütləvi Kommunikasiyalar Nazirliyi arasında rabitə və informasiya texnologiyaları sahəsində əməkdaşlığa dair Saziş”, “Azərbaycan Respublikasının Rabitə və Yüksək Texnologiyalar Nazirliyi ilə Sinqapurun Rabitə və İnformasiya Nazirliyi arasında e-hökumət sahəsində əməkdaşlığa dair Anlaşma Memorandumu”nun  imzalanması nəzərdə tutulub.

Məltəm Talıbzadə