"Ölkəmizdə ən azı bir neçə universitet var ki, rəqabətli mühit formalaşdırmaq üçün, rəqəmsal transformasiya üçün, əmək bazarına rəqabətədavamlı kadrlar hazırlamaq üçün, regionun və dünyanın təhsil mühitinə inteqrasiya olunmaq üçün ardıcıl səylər göstərirlər. Və çəkinmədən bu sahəyə böyük pullar, investisiyalar və resurslar yatırırlar".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspertin sözlərinə görə, bir neçə universitet var ki, konkret bir-iki ixtisası distant müstəviyə gətirmək üçün xeyli müddətdir ki, işlər aparırlar, investisiya yatırırlar. İxtisasa daxil olan 30-40 fənnin kontentini rəqəmsallaşdırırlar, müəllimləri hazırlayırlar, distant mərkəzlər qururlar və s. Artıq elə universitetlərimiz var ki, bu sektora milyonlarla yatırım ediblər.
Belə bir yaramır ki, universitetlər bu pulu necə doğrultmalıdır?
Lokalda necə irəli çıxmalı, regional və qlobal təhsil bazarında necə rəqabətə tab gətirməlidir?
Osman Gündüz bildirib ki, hələlik bu itiqamətdə ciddi addımlar müşahidə olunmur. Universitetlər hələlik adicə distant təhsil forması üzrə tələbə qəbulu həyata keçirmək hüququndan məhrumdur.
"Təsəvvür edin ki, bütün şəraitin ola, təhsil xidməti vermək üçün milyonlarla pul yatırasan, müəllimləri hazırlayasan, təhsil xidmətini əldə etmək istəyənlər və bu məqsədlə universitetə pul vermək istəyənlər də ola, amma bu xidməti verə bilməyəsən. Absurd bir vəziyyətdir.
Universitetlər hər il, DİM və Təhsil Nazirliyinin rəyləri ilə hökumət tərəfindən müəyyən olunan say həddində, yalnız ƏYANİ VƏ QİYABİ təhsil forması üzrə tələbə qəbulu apara bilərlər.
Distant formada tələbə qəbuluna qanun icazə versə də, DİM hələlik öz elanlarında yalnız iki ənənəvi təhsil formasına üstünlük verir. Bu isə əslində şəraiti və imkanı olub daha qabağa çıxmaq istəyən, daha üstün mövqe qazanmaq istəyən universitetləri arxadan tutub saxlamğa bənzəyir.
Baxmayaraq ki ötən bir neçə il ərzində bu sektorda xeyli müsbət istiqamətdə dəyişikliklər var, tələb-təklif dəyişib və münbit şərait formalaşıb, amma bu ictimai münasibətlərin tənzimlənməsi sanki “donub”".
Ekspert düşünür ki, yeni münasibətlər formalaşmalıdır, universitetlərin birləşərək vahid distant ixtisas formalaşdırmasına, mövcud ənənəvi təhsilin daha effektiv formalarını tapmağa, yeni universitet modelini formalaşdırmağa yönəlik addımlar atılmalıdır.
"Fikrimcə, Nazirlər Kabineti bu istiqamətdə zəruri qaydaları təsdiq etməli, DİM və Təhsil Nazirliy isə distanta iddia edən təhsil müəssisələri üçün lisenziyalaşma mexanizmlərini hazırlamalı, onları audit etməli, mövcud resurslara uyğun tələbə və müəllim sayının hədlərini müəyyən etməli və növbəti tədris ilində universitetlərin distant təhsil forması ilə tələbə qəbuluna icazə verməlidir".
