EDUTECH

AzEdu Təhsil Portalı “Azərbaycan universitetləri beynəlxalq reytinq müstəvisində: gerçəklik və hədəflər” mövzusunda dəyirmi masa təşkil edib.

Tədbirdə universitetlərin beynəlxalq reytinqlərdə irəliləməsi məsələsinə də toxunulub.

Dəyirimi masada iştirak edən Azərbaycan İnternet Forumunun prezidenti, ekspert Osman Gündüz müzakirələrin nəticəsi ilə bağlı maraqlı paylaşım edib.

Ekspert dəyirimi masanın yekunu olaraq universitetlərimizin beynəlxalq reytinqlərdə irəliləməsi üçün daha çox işi hökumətin görməli olduğu qənaətinə gəlib.

Onun sözlərinə görə, çox sayda nümunələr var ki, sanki hökumət hətta qabağa çıxmaq istəyən universitetlərimizi, necə deyərlər "tutub saxlayır":

“Rəqabətli mühitin inkişafı əvəzinə, mühit daha da məhdudlaşdırılır. Məsələn, gözümüzün önündədir ki, Azərbaycan Dövlət İqtisad Universiteti (UNEC) və digərləri distanta xeyli investisiyalar yatırdılar, müəllimləri, elektron resursları hazırladılar. Lakin bununla onlar nəinki irəli çıxa bildilər, nəinki yeni təhsil xidmətini lokal və qlobal bazara çıxara bildilər, yatırılan investisiyadan nəinki pul qazana bildilər, əksinə ziyana düşdülər”.

O, bunu səbəbinin çox sadə olduğunu bildirib:

“Qanunvericilik bu tip universitetlərin irəli çıxmasına mane olur. ETN də bu istiqamətdə yetərincə təşşəbbüskar deyil. İkinci məqam isə ölkədə on illərdi ki, rəqəmsallaşma gedir. Tələbələrin siyahıları bir neçə qurumun elektron reyestrlərindədir. Yəni, tələbə miqrasiyasına nəzarət üçün hökumətin yetərli imkanları var. Amma hökumət diplom vermək səlahiyyətini universitetlərə vermək istəmir. Daha bir nümunə isə universitetlərimiz özlərinin təşkil etdiyi, beynəlxalq standartlardan aşağı olan distant təhsil əsasında tələbəyə diplom verir və hökumət bunu tanıyır. Amma, Harvard Universitetinin distant bitirənin diplomunu tanımır. Çünki qanunlarımız buna imkan vermir”.

Ekspert hesab edir ki, hökumət, universitetlərimizin regional və qlobal təhsil bazarına çıxması, regional və qlobal təhsil platformalarına inteqrasiya üçün hələ çox iş görməlidir.