Universitetlər rəqabətli mühit üçün hansı addımları atacaq: məhkəmə yoxsa muxtariyyət ?

23-01-2021 / 22:42
Universitetlər rəqabətli mühit üçün hansı addımları atacaq: məhkəmə yoxsa muxtariyyat ?
 
"İndi də DİM-in rəhbəri Məleykə Abbaszadənin brifinq keçirəcəyi gözlənilir. Brifinqlər informasiyalı mühit üçün faydalı addımlardı, amma gərək həllini gözləyən, cəmiyyəti narahat edən məsələlərə də aydınlıq gətirilsin".
 
Xeberler.az bildirir ki, bu barədə Azərbaycan İnternet Formunun Prezidenti Osman Gündüz məlumat verib:
 
"Ötən bir neçə gündə təhsil sahəsi, təhsilin rəqəmsallaşması ilə bağlı bir neçə aktual məsələyə diqqət çəkmişdim. Daha bir həllini gözləyən məsələni bir daha xatırlatmaq istərdim.
 
UNEC milyonlarla investisiya yatıraraq Distant Mərkəz qurub. Müəllimləri hazırlayıb, təhsil resurslarını rəqəmsallaşdırıb, Universitetdə tədris və idarəetmə yetərincə rəqəmsallaşıb.
 
AzTU, ADNSU, ADA, BANM, Qərbi Kaspi və s. Universitetlər də bu sahəni inkişaf etdirmək üçün ciddi səylər göstərirlər, infrastruktur qururlar, Mərkəzlər formalaşdırırlar. Universitetlər təbii ki, bu addımları daha öndə olmaq üçün, əlavə təhsil xidmətləri üçün, yeni maliyyə imkanları üçün, beynəlxalq təhsil xidmətləri bazarına çıxış üçün atırlar".
 
Bəs görəsən bu tip Universitetlərimiz bunun faydasını görürlərmi, yaxın perspektivdə qoyulan investisiyaların bəhrəsini görə biləcəklərmi, rəqabətə davamlı bir təhsil qurumuna çevrilə biləcəklərmi?
 
Ekspert bildirib ki, bu sualların cavabı olduqca dumanlıdır.
 
"Çünki hələlik hökumət tərəfindən, Təhsil Nazirliyi və DİM tərəfindən Universitetlərin bu addımlarının qarşılığında yetərli dəstək, rəqabətli mühitin formalaşmasına səylər, normal tənzimləmə müşahidə olunmur.
 
İndiyədək də hökumət, Təhsil Nazirliyi və DİM ali məktəblərə distant formada qəbul üçün qaydalar müəyyən etməyib, hər il hər bir ali məktəb üçün ƏYANİ və QİYABİ forma üçün yerlərin sayı müəyyən olunsa da DİSTANT formada təhsil üçün qəbul planı müəyyən olunmur. Sanki bir sıra Universitetlərin inkişafı qəsdən ləngidilir.
Bu cür mühit xeyli uzandığından düşünürəm ki, vəziyyətdən çıxış yolu aşağıdakılar ola bilər :
 
1. Hökumət, Təhsil Nazirliyi və DİM distant formada təhsilin təşkilinə hazır olan ali məktəbləri audit edib lisenziya verməlidir. Və cari ildə bu ali məktəblərə ƏYANİ və QİYABİ təhsil forması ilə bərabər, DİSTANT təhsil formasınında da qəbul yerlərinin sayını müəyyən etməlidir
 
2. Əgər 1-ci bənd mümkün deyilsə onda məsuliyyət Universitetlərin üzərinə qoyulmalı və bu sahədə onlara muxtariyyat verilməlidir
 
3. Əgər 1-və 2-ci bənd alınmırsa onda düşünürəm ki, bu xidməti göstərməyə hazır olan Universitetlər yığışıb hökuməti, Təhsil Nazirliyi və DİM-i məhkəməyə vermək məsələsini nəzərdən keçirməlidir
 
4. Əgər yuxarıdakı bəndlərin heç birisi mümkün olmayacaqsa onda vəziyyət köhnə qaydada davam edəcək, ali təhsildə rəqabətli mühit formalaşmayacaq, yeni maliyyə mənbələri olmayacaq, universitetlər inkişaf üçün və beynəlxalq reytinqlərdə güclənmək üçün maraqlı olmayacaq, müasir çağırışlara cavab verən kadrlar hazırlanmayacaq və s.
 
Amma dərhal qeyd edim ki, 4-cü bənd ümumiyyətlə ağlabatan görsənmir.
Çünki 4-cü bəndin seçimi, bir müddət öncə 4-cü Sənaye İnqilabının çağırışları, bununla bağlı ölkəmizin müəyyən etdiyi hədəflər və qarşıda duran vəzifələrlə bağlı Prezidentin irəli sürdüyü fikirlərə zidd olardı.
 
Beləliklə, vəziyyətdən çıxış yolu, real görsənən yuxarıdakı üç variantdır. Hansı variantın seçiləcəyini də güman ki, yaxın vaxtlarda görəcəyik".

ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə