SÜNİ İNTELLEKT VƏ DATA

12 – 14 fevral 2024-cü il tarixlərində Birləşmiş Ərəb Əmirliklərinin Dubay şəhərində keçirilən “Dünya Hökumətlər Sammiti” başa çatıb.

 Xeberler.az xəbər verir ki, sammitin ikinci günündə “Gələcək hökumətlərin formalaşdırılması” mövzusunda təşkil edilən dəyirmi masada Dövlət İmtahan Mərkəzinin Direktorlar Şurasının sədri Məleykə Abbaszadə inkişaf etməkdə olan ölkələr üçün süni intellekt imkanlarının genişləndirilməsi mövzusunda çıxış edib.

 M.Abbaszadə vətəndaşlara daha keyfiyyətli və rahat xidmət göstərmək üçün Azərbaycanın dövlət qurumları tərəfindən müxtəlif sahələrdə süni intellektin tətbiqi istiqamətində atılan addımları və gələcəyə dair planları, habelə, süni intellektin öyrənilməsi və istifadəsi sahəsində dövlət orqanlarının özəl sektorla əməkdaşlığına dair imkanları Sammit iştirakçılarının diqqətinə çatdırıb. 

Eyni zamanda M.Abbaszadə Dövlət İmtahan Mərkəzinin işinin təkmilləşdirilməsi və vətəndaşlara göstərilən xidmətlərin səviyyəsini yüksəltmək üçün gələcəkdə müəyyən proseslərə süni intellektin inteqrasiyası nəticəsində test tapşırıqlarının hazırlanması, açıq tipli tapşırıqlar üzrə yazılı cavabların oxunması və qiymətləndirilməsi, imtahan prosesinin təhlükəsizliyinin təmin edilməsi, statistik təhlil və analitik hesabatların hazırlanması kimi planlardan danışıb.

 Qeyd edək ki, Qazaxıstanın rəqəmsal inkişaf, innovasiya və aerokosmik sənaye naziri Bağdad Mussinin açılış nitqi ilə başlayan dəyirmi masada Özbəkistan Respublikasının rəqəmsal texnologiyalar naziri Şerzod Şermatov, Bosniya Herseqovinanın Sarayevo Kantonunun ədliyyə naziri Darya Softik, Sierra Leonenin dövlət idarəçiliyi və siyasi işlər naziri Amara Kallon da daxil olmaqla müxtəlif ölkələrin nümayəndlərinin çıxışları olub. Dəyirmi masa sual-cavab sessiyası ilə yekunlaşıb.

 Xatırladaq ki, “Dünya Hökumətlər Sammiti” dünyanın hər yerindən hökumət liderləri, beynəlxalq təşkilat nümayəndələri və özəl sektor rəhbərlərini bir araya gətirir və beynəlxalq əməkdaşlıq üçün səmərəli mühit yaratmaqla gələcək nəsil hökumətləri gücləndirmək üçün onlara innovativ həlləri müəyyən etməyə imkan yaradır.