PROQRAMLAR

Hazırda qlobal miqyasda kibercinayətlərin əhəmiyyətli hissəsi IoT (İnternetə qoşulmuş əşyalar) cihazlarına qarşı yönəlir. Ötən il 600 minə yaxın IoT cihazı məşhur “Mirai” botnet şəbəkəsinin qurbanına çevrilib və ilk dəfə olaraq saniyədə 5,6 terabayt həcmində rekord DDoS hücumu qeydə alınıb (“Mirai” botneti zəif şifrələrə sahib IoT cihazlarını ələ keçirərək, onları böyük miqyaslı DDoS hücumları üçün botnetə qoşur-red.).

Xeberler.az məlumat verir ki, bunu Azərbaycan Respublikası Daxili İşlər Nazirliyinin Kibercinayətkarlıqla Mübarizə Baş İdarəsinin şöbə rəisi Yusif Hüseynov “Kibercinayətkarlar üçün yeni oyun meydançası: “Ağıllı şəhərlər” mövzusunda paneldə çıxışı zamanı deyib.

“Bütün bunlara baxmayaraq, IoT cihazları fayda baxımından da önəmlidir. Müşahidə kameraları və digər “ağıllı cihazlar” cinayətlərin aşkar olunmasını 30-40 faiz artırır. Ancaq burada əsas məsələ təhlükəsizlik tədbirlərinin vaxtında görülməsidir. Çünki bu cihazlar yalnız təhlükəsiz şəhər sistemlərinin deyil, vətəndaşların şəxsi məkanlarının da ayrılmaz hissəsinə çevrilib”, - deyə Yusif Hüseynov qeyd edib.

Y.Hüseynov əlavə edib ki, təhlükəsizlik tədbirləri 3 istiqamətdə vacibdir: “Cihazların seqmentasiyası, proqram təminatının mütəmadi yenilənməsi və insan faktorunun aradan qaldırılması. Statistikaya əsasən, kibercinayətlərin 60 faizi proqram təminatının köhnə olması, 70 faizi isə insan faktoru ilə bağlıdır. Buna görə də həm dövlət, həm də vətəndaşlar təhlükəsizlik qaydalarına ciddi əməl etməlidirlər”.