RƏQƏMSAL DÜNYA

Əmlak Məsələləri Dövlət Komitəsi (ƏMDK) tərəfindən dövlət əmlaklarının özəlləşdirilməsi üzrə göstərilən xidmətlərdən biri də “Kiçik dövlət müəssisələrinin (obyektlərinin) hərraclarda satışı” adlanır.

Xeberler.az bildirir ki, bu xidmət Azərbaycan Respublikasının qanunvericilik aktları ilə müəyyən edilmiş qaydada kiçik dövlət müəssisələrinin (obyektlərinin) nizamnamə kapitalının (ilkin start qiymətinin) 85 faizinin üzərində mülkiyyət hüquqlarının əldə edilməsi ilə bağlı hərracların keçirilməsini əhatə edir. Hərrac gününə ən azı 30 gün qalmış özəlləşdirmə haqqında məlumat komitənin rəsmi saytı (emdk.gov.az), Özəlləşdirmə portalı (privatization.az) və ƏMDK-nın rəsmi mətbu orqanı olan "Mülkiyyət" qəzetində dərc edilir.

Hərraca çıxarılan kiçik dövlət müəssisələri üzrə iştirak üçün müraciət və sifariş həm xidmət yerinə gəlməklə, həm də elektron formada həyata keçirilir. Hüquqi və fiziki şəxslər seçdikləri dövlət əmlakı üzrə sifarişçi statusu almaq üçün hərracın başlanmasına ən geci üç bank günü qalanadək özəlləşdirmə obyektinin ilkin satış qiymətinin 10 faizi həcmində behi ödəməli və zəruri sənədləri təqdim etməlidir.

Xidmətdən istifadə üçün tələb olunan sənədlərə özəlləşdirmə obyektinin ilkin satış qiymətinin 10 faizi həcmində behin ödənilməsi haqqında sənəd, sifariş bildirişi, fiziki və ya hüquqi şəxslərin iştirakı ilə bağlı digər sənədlər aiddir. Xidmətə elektron formada müraciət etmək istəyən fiziki və ya hüquqi şəxslər Əmlak Məsələləri Dövlət Komitəsinin Elektron Xidmətlər Portalındakı (e-emdk.gov.az) 29-cu xidmətə daxil ola bilər. Hərraclarda iştirak üçün sifarişlər Əmlak Xidmətləri Məkanı və Hərracların Təşkili üzrə Auksion Mərkəzində də qəbul olunur. Qeydiyyatdan keçmiş şəxslər hərraclarda həm məkana gəlməklə, həm də elektron formada iştirak edərək əmlak sahibi ola bilər.