AVADANLIQ

Konstruktor bürolarının enerjiyığıcılar uğrunda apardıqları mübarizə, deyəsən, bəhrəsini verir. İldən ilə akkumulyatorlar daha həcmli olurlar. Onların enerji yığma prosesi daha az vaxt aparır.  Ola bilsin ki, ABŞ mütəxəssislərinin icad etdikləri yenilik bu yaxınlarda öz bəhrəsini verəcək. Hamıya məlumdur ki, elektromobil ekoloji cəhətdən sərfəli nəqliyyat növüdür. Lakin əsrlik tarixinə baxmayarq, elektromobil adi avtomobildən texniki parametrlərinə görə xeyli fərqlənir. Elektromobilin əsas problemi–batareyadır. Batareyanın enerji yığma prosesi həddindən artıq çox vaxt aparır.

ABŞ alimləri bir neçə saniyəyə enerji yığan batareya icad ediblər. Bu yenilik elektromobilləri popilyar edəcək və nəticədə milyonlarla insan ətraf mühiti qoruyan avtolardan istifadə edə biləcək. Alimlər Nature jurnalına verdikləri müsahibədə bildiriblər ki, cihazın əsasını LiFePO4 materialı təşkil edir. Materialın əsasına qoyulmuş nanoölçülü qranullar litium fosfatı əsaslı şüşəyəbənzər layla öryülüblər. Bu texnologiya litium ionlarının kristal quruluşuna keçmə prosesini asanlaşdırır. Nəticədə enerji toplama prosesi xeyli az vaxt aparır. Ənənəvi akkumulyatorlarda ionların elektrodlar arasında gediş-gəlişi çox ləng olur. Akkumulyator xeyli enerji toplayandan sonra enerjinin hamısını bir anda itirə bilər.