AZNET

“Bu gün Dövlət İmtahan Mərkəzinin təşkil etdiyi dövlət qulluğu vəzifəsinə iddia edənlərin müsahibə mərhələsində komissiya üzvü olaraq yenidən iştirak etdim. Bu dəfə də məhkəmədə “məsləhətçi - kompüter proqramçısı” inzibati vəzifəsini tutmaq istəyən iddiaçılar iştirak edirdilər”.

Xeberler.az  məlumat verir ki, bu sözləri Azərbaycan İnternet Forumunun prezidenti, İKT sahəsi üzrə ekspert Osman Gündüz deyib.

O.Gündüz bildirib ki, ötən müsahibələrdə olduğu kimi bu tip prosedurlar kifayət qədər şəffaf və ədalətli keçirilir:

“Amma bəzən gözlənilməz və qeyri-adi vəziyyətlər qaçılmaz olur. İddiaçının biri yetərincə hazırlıqlı idi. Vəzifəyə uyğunluqla bağlı yekun qiymətləndirmədə məlum oldu ki, 20 mümkün baldan mən 17 bal, DİM nümayəndəsi 17 bal , həmin vakansiyanının sifarişçisi olan məhkəmənin nümayəndəsi isə 12 bal verib. Bununla da orta bal 15.3 oldu. Keçid balı isə 16 olduğundan həmin iddiaçı qəbul olunmadı. Həmin vəzifəyə iddialı olan digərləri isə ümumiyyətlə bu vəzifənin tələblərinə, qulluq funksiyalarının icrasına cavab vermirdilər”.

Ekspert qeyd edib ki, qaydalara görə komissiya üzvlərinin balları arasında ciddi fərqlər olarsa və bu fərq nəticəyə təsir edərsə, onda nəticələr avtomatik ləğv olunur:

“Beləliklə, xeyli zaman və resurslar sərf olunmasına baxmayaraq, bugünkü müsahibənin nəticəsi ondan ibarət oldu ki, heç kimin bu vəzifəyə uyğunluğu qəbul edilmədi. Düşünürəm ki, burada əsas məqam məhkəmənin göndərdiyi nümayəndənin İT sahəsi üzrə peşəkarlığının yetərli olmaması ilə bağlı idi. Yəni, məhkəmədə texniki-texnoloji prosesləri yerinə yetirməli olan birisinin bilik və bacarıqlarını yoxlamaq üçün gərək məhkəmələr bu sahəyə uyğun nümayəndələr göndərsinlər. Ümid edirəm ki, qaydalarda bununla bağlı dəyişikliklər öz əksini tapacaq”.