Bildirdiyimiz kimi bu gün Qubada Elektron Hökumət üzrə İcra Qrupunun növbəti görüşü baş tutub.
Xeberler.az bildirir ki, bu barədə Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.
"Görüşdə dövlət qurumlarının rəqəmsal bölmələrinin rəhbərləri, ictimaiyyət nümayəndələri, ekspertlər iştirak ediblər.
Koordinasiya qurumu dövlət informasiya resursları sahəsində vahid koordinasiyanı həyata keçirmək, habelə rəqəmsal hökumətə keçidin , elektron hökumətin inkişafı və təşviqi üzrə dövlət orqanlarının fəaliyyətinin əlaqələndirilməsini təmin etmək məqsədi ilə yaradılıb.
Bu gün keçirilən görüşdə bir xeyli faydalı məsələlər müzakirə edildi. Fikir mübadiləsi aparıldı. Bizə də fikirlərimizi çatdırmaq üçün şərait yaratdılar.
Düşünürəm ki, 6-cı dəfə təşkil olunan bu formatda görüş çox faydalıdır. Ötən dövrdə bu istiqamətdə müəyyən işlər görülüb.
Bununla belə hiss olunur ki, kordinasiyanın gücləndirməsinə ciddi ehtiyac var. Son dövrlərin beynəlxalq hesabatları da göstərir ki görüləcək işlər daha çoxdur. Əgər Rəqəmsal hökumət qurulursa və koordinasiya qrupu da onun əsas orqanıdırsa demək onun təsir imkanları genişləndirilməli və rolu artırılmalıdır. Nazirlər və nazir müavinləri, hökumət üzvləri , deputatlar bu tip görüşlərdə aktiv iştirak etməlidir.
Əks halda inteqrasiyanı tamamlamaq uzun zaman alacaq. Rəqəmsal hökumətə keçidin hüquqi təminatı çox ləngiyir. Son zamanlar yaxşı nümunələr də var. Görüşdə təqdim olunan "Mobil notariat" resursunun son versiyası da hazırda ən faydalı hökumət rəqəmsal həlli hesab oluna bilər.
Faydalı , mobil rəqəmsal həllər hələlik çox azdır. Mövcud rəqəmsal arayışların və məlumatların hüquqi təminatı yaradılmalıdır. Düşünürəm ki, eGov koordinasiya qrupunun rəhbərliyi dövlət qurumlarında eGov-a , rəqəmsal hökumətə cavabdeh şöbələrin və departamentlərin rolunun artırılması istiqamətində işlər aparmalıdır. Hər bir Nazirlikdə Nazir müavinlərindən biri yalnız rəqəmsal sektora cavabdehlik daşımalıdır və kordinasiya qrupunda təmsil olunmalıdır.
Bu gün keçirilən görüşü də faydalı hesab edərək, İcra Qrupun görüşlərinin intensivliyinin və məhsuldarlığının daha da artırılmasının əhəmiyyətli olacağını düşünürəm".
