RƏQƏMSAL DÜNYA

“Elektron hökumət quruculuğu ilə bağlı prezidentin son dövrlərdə qəbul etdiyi rəsmi sənədlərdə bu, sahədə kordinasiya işlərinə, tənzimləməyə, dövlət qurumlarının informasiya sistemlərinin inteqrasiyası məsələlərinə ciddi önəm verilib”.

Xeberler.az  bildirir ki, bu sözləri Azərbaycan İnternet Forumunun prezidenti, İKT sahəsi üzrə ekspert Osman Gündüz deyib. 

O.Gündüz bildirib ki, “eGov” quruculuğu istiqamətində son dövrlərdə müəyyən işlər görülsə də, bir sıra problemlər hələ də qalmaqdadır:

“Xüsusilə dövlət qurumlarının kordinasiyasını gerçəkləşdirməli olan əlaqələndirmə mərkəzi formalaşmayıb. Dövlət qurumlarının informasiya sistemlərinin tam inteqrasiyası məsələsi isə uzun illərdir ki, problem olaraq qalmaqdadır. Hələ də hansısa dövlət qurumunda vətəndaşla bağlı sənədlər olmasına baxmayaraq, digər dövlət qurumu yenidən ondan bu sənədləri tələb edir. İnteqrasiyanın yetərli olmaması səbəbindən “eGov”un üstünlüklərindən tam faydalanmaq olmur”.

Ekspert qeyd edib ki, Vətəndaşlara Xidmət və Sosial İnnovasiyalar üzrə Dövlət Agentliyi “eGov” sahəsində vahid tənzimləyici orqan olaraq bu, sahədəki işləri canlandırmalıdır:

“Regional elektron hökumət quruculuğu məsələsində isə daha ciddi problemlər var. Regionlarda əhaliyə göstərilməli olan xidmətlərin böyük əksəriyyəti elektron formaya keçirilməyib.

Düşünürəm ki, prezident tərəfindən rəqəmsal hökumətə keçidlə bağlı mart ayında qəbul edilən fərmanda nəzərdə tutulan “Rəqəmsal hökumətə keçid üzrə Fəaliyyət Planı”nı, inteqrasiya üçün zəruri olan vahid qaydaları tez bir zamanda ortaya çıxarmaq və reallaşdırılmasına başlamaq lazımdır”.