Ekspert: TN, DİM və ali təhsil müəssisələri informasiya sistemlərini inteqrasiya etməlidir

19-07-2022 / 13:42

Rəqəmsal hökumət quruculuğu və rəqəmsal transformasiyanın formalaşdırdığı yeni mühit: rahatlıq və effektivlik, yoxsa yeni bürokratiya?

Xeberler.az bildirir ki, bununla bağlı Azərbaycan İnternet Forumunun Prezidenti, ekspert Osman Gündüz öz feysbuk səhifəsində paylaşım edib.

"Hazırda ali təhsilin magistratura səviyyəsinə elektron sənəd qəbuluna start verilib.
Sənəd qəbulu haqqında elanlara diqqət yetirdikdə təəccüblənməmək və təəssüf hissi keçirməməmək mümkün deyil. Magistrlar üçün nəinki iki pilləli, hətta üç pilləli qeydiyyat proseduru müəyyən olunub:

1. İlk öncə magistr Təhsil Nazirliyinin portal.edu.az/ resursunda qeydiyyatdan keçməlidir və zəruri sənədləri sistemə yükləməlidir;

2. Bundan sonra magistr qəbul olunduğu universitetin informasiya sistemində qeydiyyatdan keçməlidir və müvafiq sənədlərin elektron formalarını sistemə yükləməlidir;

3. Nəhayət, hər iki mərhələni bitirəndən sonra magistr həmin sənədləri kağız formada toplayıb universitetə getməli və oflayn formada şənədlərini təqdim etməlidir. (Elanlardan görünür ki, hələlik yalnız UNEC bu mərhələni tələb etmir)

Yəni, görünən odur ki, rəqəmsal transformasiya, rəqəmsal hökumət quruculuğu nəinki prosesləri sürətləndirib və zaman itkisinin qarşısı alıb, nəinki optimallaşmaya və rahatlığa səbəb olub, əksinə, vətəndaşın vəziyyətini daha da çətinləşdirib.

Tələb olunan sənədlərin siyahısına diqqət etdikdə görmək olar ki, hər bir sənəd hansısa bir dövlət qurumunda elektron formada var. Buna baxmayaraq vətəndaşdan yenidən həmin sənədlər kağız və ya elektron formada tələb olunacaqsa onda rəqəmsal hökumət quruculuğuna, rəqəmsal transformasiyaya nə ehtiyac var?
15 il elektron hökumət quruculuğu prosesi getdiyi bir zamanda vətəndaşdan həm ikili elektron qeydiyyat, həm də kağız sənədlər toplamaq nə dərəcədə doğrudur?

Mövcud qanunvericilik tələb edir ki, TN-nin, DİM-in, digər aidiyyatı dövlət qurumlarının və heç olmasa dövlət universitetlərinin informasiya sistemləri inteqrasiya olunmalı, vahid qeydiyyat prinsipi müəyyən olunmalı və vətəndaşdan kağız formada sənədlər tələb olunmamalıydı. Bununla bağlı qanunvericilik mövcuddur. Uzun illərdir ki, bu problem davam edir. Təəssüf ki, rəqəmsal hökumətə cavabdeh olan Elektron Hökumətin İnkişafı Mərkəzi indiyədək Təhsil Nazirliyi ilə birgə bu problemi həll edə bilməyib.

Düşünürəm ki, TN, DİM və ali təhsil müəssisələri tez bir zamanda informasiya sistemlərini inteqrasiya etməlidir. EHİM səylərini gücləndirməli, təhsilə məxsus informasiya sistemlərinin digər dövlət qurumlarına inteqrasiyası üçün konkret addımlar atmalıdır. İnteqrasiya ilə bağlı digər sahələrdə də oxşar proseslər var və davam edir.

Təklifim odur ki, EHİM təcili hökumət qarşısında məsələ qaldırmalıdır :
Əgər vətəndaşla bağlı hansısa BİR dövlət qurumunda informasiya varsa həmin informasiyanı DİGƏR dövlət qurumunun kağız və ya elektron formada yenidən vətəndaşdan tələb etməsi QADAĞAN edilməlidir. Əks halda, görünür ki, rəqəmsal proseslər uzun müddət ləngiyəcək və ən pisi odur ki, daha "müasir" bürokratik proseslər formalaşacaq".


ŞƏRHLƏR






sorğu
İT mütəxəssislər iş yerlərini hansı meyarlar əsasında seçir ?
  • Şirkətin yüksək statusuna görə
  • İşin, layihənin xarakterinə görə
  • Əmək müqaviləsinin olmasına görə
  • Yüksək əmək haqqına, mükafatlara və digər güzəştlərə görə
  • Gələcək karyerası üçün əhəmiyyət kəsb etdiyinə görə
  • Maraqlı, işgüzar kollektivə görə