TƏHLÜKƏSİZLİK

“XRİTDX və DTX-nin təşkil etdiyi "Kibermüharibə" başa çatdı. Sektorun inkişafı və kadrların hazırlanması, bacarıqların dəyərləndirilməsi və bu sahəyə maraq yaradılması baxımından çox faydalı bir tədbir idi”.

Bu barədə Azərbaycan İnternet Forumunun prezidenti, ekspert Osman Gündüz paylaşım edib.

Onun sözlərinə görə, bir neçə ay çəkən bu yarışmada kritik qurumların, əsasən dövlət və özəl sektorun, bankların kiber komandaları təmsil etdikləri qurumların kiber təhlükəsizliyini necə qoruyacaqlarını nümayiş etdirdilər.

“Yarışmanın ötən həftənin sonu baş tutan yekun mərhələsində ilk üç yerin qalibləri, SOCAR, Azercell və Prezidentin Təhlükəsizlik Xidmətinin kiber komandaları olub.

Təşkilatçılıq yüksək səviyyədə idi. Hansısa ədalətsizlik və tərəfkeşlik halları haqqında indiyədək nəsə qarşıma çıxmayıb. Beləliklə, nəzərə alsaq ki, Azercell də dövlət şirkətidir, görünən odur ki, ölkənin kiber sektorunda ən güclülər dövlət sektorundadır”.

Osman Gündüz bildirib ki, elə finalda yarışan 20 komandanın da yekun nəticələri bunu deməyə əsas verir:

“Ballara baxanda görsənir ki, dövlət sektoru daha üstündür. Özəl sektor, xüsusən banklar bu haqda ciddi düşünməlidirlər. Düşünürəm ki, qərar qəbul edənlər, maraqlı tərəflər kibertəhlükəsizliklə və kritik infrastrukturla bağlı sahənin inkişafına, bu sahəyə resursların ayrılması və ondan effektiv istifadə məsələlərinə diqqəti artırmalıdırlar”.