Milli Ödəniş Sistemi komponentləri təkmilləşdirilir

10-02-2016 / 17:45

Cari ildə Milli Ödəniş Sistemi komponentlərinin təkmilləşdirilməsi istiqamətində işlər davam etdiriləcək.

Xeberler.az APA-ya istinadən məlumat verir ki,  bunu "Azərbaycanın vergi sistemi: reallıqlar və perspektivlər" adlı V Vergi Forumunda çıxışı zamanı Mərkəzi Bankın ödəniş sistemləri və hesablaşmalar departamentinin direktor müavini Vahid Qurbanlı deyib.

Onun sözlərinə görə, xırda ödənişlər üzrə hesablaşma-klirinq sistemində beynəlxalq praktikada geniş istifadə olunan birbaşa debetləşmə ödəniş alətindən istifadə təmin olunacaq. V. Qurbanlı əlavə edib ki, bununla yanaşı, banklara, iştirakçı təşkilatlara verilmiş avtomatlaşdırılmış iş yerləri tam yeni müasir platformaya keçiriləcək: "Milli Ödəniş Sistemi komponentlərinin təkmilləşdirilməsi istiqamətində işlər bununla yekunlaşmayacaq. Belə ki, klirinq sistemində də iştirakçı təşkilatlarla informasiya mübadiləsində informasiya təhlükəsizliyinin təmin olunması üçün bank sertifikat xidmətləri mərkəzindən istifadə təmin olunacaq".

"Mərkəzi Bankın qanunla müəyyənləşdirilmiş əsas səlahiyyətlərindən biri də ölkədə ödəniş sistemlərinin o cümlədən, hesablaşma-klirinq sistemlərinin yaradılması, onların fəaliyyətinin təşkil edilməsi və sabitliyi və inkişafının təmin edilməsidir. Bu missiya çərçivəsində bütün inkişaf etmiş ölkələrdə olduğu kimi, bizim ölkədə də əsas komponentləri iri və təcili ödənişlər üzrə real vaxt rejimində banklararası hesablaşmalar sistemi və xırda daim təkrarlanan ödənişlərin elektron daşıcıyılarla həyata keçirilməsi üçün nəzərdə tutulmuş xırda ödənişlər üzrə hesablaşma klirinq sistemi olan Milli ödəniş Sistemi infrastrukturunun sabit və etibarlı fəaliyyətinin təmin edilməsi diqqət mərkəzində saxlanılır. Son illərdə ölkəmizdə telekommunikasiya şəbəkələrinin və elektron imza infrastrukturunun müasir standartlar əsasında inkişaf etdirilməsi Milli Ödəniş Sistemi komponentlərinin təkmilləşdirilməsi üçün əlverişli şərait yaradıb. Yaranmış əlverişli şəraitdən istifadə edərək Mərkəzi Bank bu istiqamətdə xüsusi tədbirlər həyata keçirir. Bu tədbirlər çərçivəsində Mərkəzi Bankda bank sertifikat xidmətləri yaradılıb və  qanunvericilik tələbləri əsasında akkreditə olunub. Biz 2000-ci ilin əvvəllərində iri və təcili ödənişlər sistemini yaradanda Azərbaycanda telekommunikasiya şəbəkələri və elektron imza infrastrukturu demək olar ki, yox səviyyəsində idi. Buna görə də biz bu sistemlərin əsasını beynəlxalq infrastrukturlar üzərində qurmuşuq. Bu asılılıq uzun illər davam edirdi. Yaranmış imkanlardan istifadə edərək iri və təcili ödənişlər sisteminin Mərkəzi Bankın sifarişi ilə Rabitə və Yüksək Texnologiyalar Nazirliyinin Məlumat-Hesablama Mərkəzi tərəfindən yaradılmış qapalı telekommunikasiya şəbəkəsi üzərindən işləməsi, fəaliyyət göstərməsi təmin olunub. Aydındır ki, beynəlxalq infrastrukturlar üzərindən işləməni alternativ xətt kimi saxlamışıq. Eyni zamanda, yaranmış yeni infrastrukturda, qapalı telekommunikasiya şəbəkəsi üzərindən işləyərkən informasiya təhlükəsizliyini maksimum standartlar əsasında təmin olunması üçün yuxarıda qeyd etdiyim Mərkəzi Bankda yaradılmış Bank Sertifikat Xidmətləri Mərkəzinin imkanlarından, elektron sertifikatlarından istifadə edilir. Beləliklə Milli Ödəniş sisteminin əsas komponentində yerli alternativ infrastrukturdan istifadə olunmaqla, beynəlxalq infrastrukturlardan asılılıq tamamilə ləğv edilib. Görülmüş bu preventiv tədbirlərin nəticəsidir ki, keçən ilin noyabr ayında ölkədə telekommunikasiya şəbəkəsində baş vermiş qısa böhran zamanı ödəniş sistemlərinin fəaliyyətində heç bir fasilə olmayıb”.

Xeberler.az


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.