Nazirlik və Avropa Nüvə Araşdırmaları Təşkilatı arasında əməkdaşlıq müzakirə olunub

13-10-2015 / 13:08

CERN-in (Avropa Nüvə Araşdırmaları Təşkilatı) ALİCE (A Large Ion Collider Experiment) təşkilatının rəhbərlərindən ibarət nümayəndə heyəti Azərbaycanda rəsmi səfərdədir.

Xeberler.az bildirir ki, səfər çərçivəsində Rabitə və Yüksək Texnologiyalar Nazirliyində (RYTN) ALİCE-in sədri, professor Paolo Giubellinonun başçılıq etdiyi nümayəndə heyəti ilə görüş keçirilib. Rabitə və yüksək texnologiyalar nazirinin birinci müavini İltimas Məmmədovun rəhbərliyi ilə keçirilən görüşdə nazirliyin yüksək texnologiyalar sahəsində apardığı işlər barədə məlumat verilib.

Nüvə texnologiyaları, nüvə elmlərinin RYTN üçün yeni fəaliyyət istiqaməti olduğunu nəzərə çatdıran birinci müavin ölkəmizin bu sahədə beynəlxalq əməkdaşlığın genişləndirilməsində maraqlı olduğunu diqqətə çatdırıb və qeyd edib ki, bu əməkdaşlıq azərbaycanlı alim və tələbələrin Böyük Adron Kollayderində fəaliyyət göstərən ALİCE-də iştirakına imkan verəcək. 

Eyni zamanda, RYTN-in inşa etdiyi Tier III səviyyəli regional DATA mərkəzi (Məlumatların Emalı və Saxlanılması Mərkəzi) haqda məlumat verilib. Böyük imkanlara malik bu mərkəzin CERN-də istifadəsi müzakirə olunub, xüsusilə DATA mərkəzdə ALİCE təcrübəsində toplanmış məlumatların analizi və saxlanılmasından danışılıb.

Milli Nüvə Tədqiqatları Mərkəzinin (MNTM)  infrastrukturu  və DATA Mərkəzlə tanış olduqlarını qeyd edən Professor Paolo Giubellino   qısa zamanda görülən işləri yüksək qiymətləndirib.  Daha sonra  professor Paolo Giubellino  ALİCE haqqında məlumat verib və qeyd edib ki, hazırda ALİCE-nin 37 ölkədən 1550 iştirakçısı var. Onun sözlərinə görə, ALİCE təcrübəsində kainatda 14 milyard il bundan əvvəl olan şəraiti almaq mümkündür. Bu missiyanı yerinə yetirmək üçün ALİCE təcrübəsində qabaqcıl texnologiyalardan və hesablama üsullarından istifadə olunur. Bura xüsusilə nəhəng kompüter şəbəkələrinin quraşdırılması, böyükhəcmli məlumatların emalı daxildir.  Görüşdə ALİCE təcrübəsi ilə Milli Nüvə Tədqiqatları Mərkəzi arasında əməkdaşlıq memorandumunun imzalanması da müzakirə edilib.

Qeyd edək ki, görüşdə ALİCE şurasının sədri, professor Peter Braun-Munzinger, ALİCE təcrübəsində Ukrayna qrupunun rəhbəri, professor Gennady Zinovyev və digər rəsmi qonaqlar iştirak ediblər.

Ölkəmizə səfərini davam etdirən qonaqlar RYTN  tərəfindən Bakı Dövlət Universitetində təşkil olunan və  azərbaycanlı alim və tələbələr üçün  nəzərdə tutulan seminarda da çıxış edəcəklər.

 

Xeberler.az 


ŞƏRHLƏR





sorğu
Delta Telecom şirkətinin son istifadəçiyə birbaşa internet xidməti göstərməsi internet bazarında vəziyyəti necə dəyişə bilər ?
  • “Çəkidə aldatma” aradan qalxacaq və internetin keyfiyyəti yüksələcək.
  • İnternet bazarında sərbəst və azad rəqabət güclənəcək.
  • Qiymətlər enəcək və daha sürətli internetdən istifadə edənlərin sayı kəskin artacaq
  • İnternet bazarında rəqabət azalacaq.