Məlum olduğu kimi bir neçə gün öncə Misirdə növbəti Beynəlxalq İnformatika Olimpiadası -İOİ 2024 başa çatıb. Dünyanın ən nüfuzlu, bütün qlobal şirkətlərin izlədiyi, mötəbər bir beynəlxalq yarışmadır.
"Bu olimpiadada 4 qızıl medal aldığı bildirilən Çin komandasına aid bir skandal ilə bağlı, İOİ qaydalarını pozduqlarına görə 2 qızıl medalın əlindən alınması ilə bağlı İOİ Beynəlxalq Komitəsinin qərarı olduğunu öyrəndim".
Bu sözləri Azərbaycan İnternet Formunun Prezidenti, ekspert Osman Gündüz deyib:
Ekspert qeyd edib ki, qərarı Beynəlxalq Komitə verdiyindən, bu faktı dəqiqləşdirmək üçün qurumun hazırda Azərbaycandan olan üzvü, ADA Universutetinin professoru, buradakı İT Məktəbin keçmiş dekanı Araz Yusubov ilə əlaqə saxlayıb: Məlum oldu ki, Araz müəllim pul tapa bilmədiyinə görə bu mötəbər tədbirə qatıla bilməyib.
Osman Gündüzün sözlərinə görə, Azərbaycan üçün şərəf gərirən, nüfuzlu bir beynəlxalq qurumun rəhbərliyində təmsil olunan az saylı şəxslərdən biri olasan, amma pulsuzluqdan orada iştirak edə bilməyəsən:
"Araşdırma ilə müəyyən etdim ki, Araz Yusubov çox çalışıb ki, vəsait əldə etsin. Lakin nə bu sahəyə məsul qurum olan Elm və Təhsil Nazirliyinin Təhsil İnstitutu, nə sponsor olan Azercell, nə də Olimpiadaya Hazırlıq Mərkəzi Beynəlxalq Komitə üzvünün səfərini maliyyələşdirə bilməyib. Hansı ki sadəcə yol xərci, təxminən 2-3 min manat ödənilməlidir".
Doğurdanmı adı çəkilən qurumlar bu vəsaiti tapa bilməyiblər?
Ekspert düşünür ki, ya burada sadəcə sayğısızlıq və diqqətsizlik olub, yəni qəsdən olmayıb, bəlkə sadəcə məsuliyyətsizlik olub. Yaxud da kiminsə intriqaları, ambisiyaları, gözü götürməzliyi, paxıllığı, ya nəsə bu tip pis niyyətləri olub:
"Ümid edirəm bir daha təkrarlanmaması üçün, bu tip proseslərdə Azərbaycan maraqlarının və sadəcə ədalətin təmin edilməsi üçün nazir Emin Əmrullayev araşdırma və tədbir görmək üçün tapşırıq verəcək".
