İNNOVASİYA VƏ STARTAP

Startap Azərbaycan 2016 müsabiqəsi başa çatmaq üzrədir.

Dünən Yüksək Texnologiyalar Parkında müsabiqənin yarımfinalçılarının yekun qiymətləndirilməsi baş tutub.

Xeberler.az-ın məlumatına görə, tədbiri giriş sözləri ilə Azərbaycan İnternet Forumunun rəhbəri, Startap Azərbaycan Təşkilat Komitəsinin üzvü Osman Gündüz açıb.

O, müsabiqənin gedişi və təqdimatın qaydaları barədə bir daha iştirakçılara və ekspertlərə ətraflı məlumat verib.

Osman Gündüz müəyyən olunacaq qaliblərin yekun təqdimat mərasimində elan olunacağını diqqətə çatdırıb.

 Startap Azərbaycan Təşkilat Komitəsindən verilən məlumata görə Startap Azərbaycan 2106-nın yekun təqdimat mərasimin ənənəvi Startap Azərbaycan milli konfransı iyunun 1-də keçiriləcək.

Qeyd edək ki, ekspertlər bu dəfə də layihələri 5 istiqamət -komanda, layihənin davamlılığı, layihənin ideyası və cəlbediciliyi, layihənin gəlirliliyi, layihənin əhatə dairəsi üzrə qiymətləndirib.

Təqdimat üçün hər bir komandaya 8 dəqiqə vaxt ayrılsa da ekspertlərin sorğu –suallarının çox olması səbəbindən hər bir komandaya ayrılan vaxt limiti uzadılıb.

TK-dan bildirilib ki, 9 ekspert 2-ci qiymətləndirmədə iştirak edib.

Qiymətləndirmədə iştirak edən ekspertlər :

 -Müşviq Həsənov

- Vahid Qasımov

- Rafael Əzizov

-Vüqar Əliyarov

-Rəşad Camal 

-Rəşad Əliyev

-Vaqif Abbasov

-Elşad Yusifli

-Fərid  Kazımov

Təşkilat Komitəsindən bildirilib ki,  ekspertlərin verdiyi ballar əsasında yarımfinalçılar arasından qaliblər müəyyən olunacaq.

Xəbər verdiyimiz kimi, bu il keçirilən müsabiqəyə 45 startap müraciət etsə də, Startap Azərbaycan qaydalarına uyğun olan 20 startap yarışmaya buraxılıb və 1-ci mərhələdə ekspertiza üçün ekspertlərə göndərilib.

1-ci mərhələ qiymətləndirmənin yekununda 10 startap yarımfinalçı seçilməklə Startap Azərbaycan yarışmasında mübarizəni davam etdirmək statusu qazanıb.

Onu da qeyd edək ki, bu il müsabiqə qaydalarına edilən dəyişikliyə görə, müsabiqəyə ən azı ilkin demo versiyası ( ilkin işlək variantı) olan layihələr buraxılıb.

Bir daha xatırladırıq ki,  yekun təqdimat məraismi və ənənəvi Startap Azərbaycan milli konfransı iyunun 1-də Holidey İnn otelində keçiriləcək.

Startap Azərbaycan layihəsinə Rabitə və Yüksək Texnologiyalar Nazirliyi, İT-nin İnkişafı Dövlət Fondu və Yüksək Texnologiyalar Parkı dəstək verir.

Startap Azərbaycan-ın Akademik partnyoru ADA Universitetidir.

ATL Group, SİNAM, Neuron Technologies, SUP Accelerator, NEXT STEP İnnovasiya Mərkəzi və Cybernet şirkətləri Startap Azərbaycan-a dəstək verir və sponsorluq edirlər.

Dünənki tədbirlə bağlı bütün fotolar Startap Azərbaycan-nın Facebook səhifəsində yerləşdirilib.

Məltəm Talıbzadə