20 oktyabr 2022-ci il tarixində Rəqəmsal İnkişaf və Nəqliyyat Nazirliyinin insan resurları şöbəsinin məsul əməkdaşlarının və Azərkosmos ASC, Elektron Təhlükəsizlik Xidməti, Dövlət Mülki Aviasiya Agentliyi, Dövlət Radiotezliklər İdarəsi, “İKT Lab”ın iştirakı ilə İRİA-da görüş keçirilib. Agentliyin rəhbəri İnarə Vəliyeva və “Technest” Təqaüd Proqramının heyəti təqaüdçülərin uğur hekayələrini bölüşərək proqramın 2023-cü il üzrə fəaliyyət planını təqdim ediblər.
Xeberler.az bildirir ki, görüşdə Bakı və regionlarda İKT üzrə işçi ehtiyatının təminatı və işəgötürənlərin sorğularına əsasən peşəkar mütəxəssislərin hazırlanması istiqamətində fikir mübadiləsi aparılıb. “Technest” təqaüdçülərinə artan tələbat və cari il üzrə şirkətlərin gözləntilərinə əsasən tələb-təklifin hazırlanması nəzərdən keçirilib. Həmçinin, “Technest İcması” çərçivəsində məzunların ölkənin aparıcı işguzar simaları ilə görüşlərinin təşkili, təqaüdçülərin təqdimat bacarıqlarının artırılması, müəssisə və şirkətlərdə keçirilən təcrübə proqramlarında fəal iştirakları üzrə razılığa gəlinib. Əmək bazarında ”Technest” məzunlarının daha geniş təşviq edilməsi və işlə təminatı istiqamətində səylərin birləşdirilməsinin 2023-cü ildə də prioritet olması planlaşdırılır.
