TEXNOLOGİYA

AMEA İnformasiya Texnologiyaları İnstitutunun elmi seminarının növbəti iclasında “Kompüter sistemlərinə xidmətlər üzrə dünya təcrübəsi” mövzusunda məruzə dinlənilib.

Xeberler.az-ın məlumatına görə, məruzəni təqdim edən institutun 11 saylı şöbəsinin müdiri Şakir Mehdiyev texniki xidmətin aktuallığı, strategiyaları, bu sahədə dünya təcrübəsi haqqında ətraflı məlumat verib.

O,  bildirib ki, elm və texnikanın inkişafı digər sahələrdə olduğu kimi öz növbəsində informasiya texnologiyaları sahəsində edilən ənənəvi texniki xidmətlərin yeni vasitələrinin yaradılmasına səbəb olub.

 Texniki xidmət (TX) texniki sistemlərdə təyinatlı fəaliyyətinin yerinə yetirilməsinə və saxlanılmasına yönəldilmiş xidmət sahəsidir.

Sonra Ş.Mehdiyev elektron texniki xidmətin imkanlarından danışıb. Onun sözlərinə görə, buraya onlayn fasiləsiz smart xidmət, resursların avtomatik monitorinqi, nəzarət və profilaktikanın operativliyi və s. aiddir.

Məruzəçi texniki xidmətin kəmiyyət indikatorlarına TX-ə sərf olunan vaxt və maliyyə, ehtiyat hissələrinin miqdarı və qiyməti, texniki xidmətin keyfiyyət indikatorlarına isə səmərəlilik, təhlükəsizlik, əldə olunan nəticələrin sabitliyi və s. aid olduğunu bildirib.

Ş.Mehdiyev qeyd edib ki, dünyada tətbiq sahələrinin maliyyə itkilərinə 85% istifadəçi səhvi, 12% avadanlıqların imtinası, 3% iri miqyaslı qəzalar və fövqaladə hadisələr səbəb olur. O, həmçinin texniki xidmətin insorsinq, autsorsinq, autstafinq kimi iqtisadi modelleri haqqında məlumat verib.

Günel