E-TİCARƏT

Türkiyənin e-ticarət bazarı ilə bağlı statistik məlumatlar açıqlanıb.

TÜSİAD, GittiGidiyor və The Boston ConsultingGroup (BCG)  şirkətləri "Rəqəmsallaşan Dünyada İqtisadiyyatın itələyici gücü: e-Ticarət" adlı hesabat hazırlayıb.

Xeberler.az Türkiyə KİV-lərinə istinadən məlumat verir ki, hesabatda Türkiyənin e ticarətdə gəldiyi  inkişaf nöqtəsi və bundan sonrakı gözləntilər barədə məlumatlar yer alıb.

Hesabatın təqdimat mərasimində açılış nitqi edən TÜSİAD İdarə heyətinin başçısı Erol Biləcik Türkiyədə e-ticarətin ümumi pərakəndə ticarətdə aldığı payın hələ  3.5 faiz ətrafında olduğunu deyib.

GittiGidiyor rəsmisi Öget Kantarcı isə Türkiyənin 58 faizlik internet və 65 faizlik ağıllı telefon populyarlığı ilə e-ticarət sektorunda ən çox potensial olan ölkələr arasında olduğunu qeyd edib.

Onun sözlərinə görə, pərakəndə e-ticarət həcmi 2016-cı ildə 32 faiz böyüyərək 17.5 milyard TL-yə çatıb:

“Bu sürətli artıma baxmayaraq e-ticarətin ümumi pərakəndə aldığı pay hələ də 3.5 faizdir. Bu rəqəm dünya ortalaması ilə müqayisədə 8.5 faizdir. Bu səbəbdən də gedəcək daha çox yolumuz var. Türkiyədə pərakəndə e-ticarət həcminin 2019-cu ildə 35 milyard TL-yə çatacağını düşünürəm”.

Hesabata Türkiyənin e-ticarət bazarında diqqət çəkən məqamları qeyd edirik:

-Qlobal e-ticarətin həcmi son 4 ildə 630 milyard dollardan 1,6 trilyon dollara, ümumi pərakəndə daxilində payı isə 4,2 faizdən 8,5 faizə çatıb. 2021-ci ildə bu nisbətin 13 faizə çatacağı gözlənilir

-2020-ci ildə qlobal e-ticarət həcminin 64 faizinin inkişaf etməkdə olan ölkələr tərəfindən yaradılması gözlənilir. Dünyada e-ticarət həcmi 400 milyard dollarlıq bir həcmə çatıb. E-ticarət böyüməyə davam edərək, 2020-ci ildə 1 trilyon dollar yaxınlaşacaq

-Türkiyədə e-ticarətin həcmi 2016-cı ildə 17,5 milyard TL-yə çatıb. 2012-ci ildə 1,7 faiz olan e-ticarətin ümumi  pərakəndədə payı isə 3,5 faizə yüksəlib

- Türkiyədə ənənəvi pərakəndəçilərin ümumi e-ticarət bazarından aldığı pay təxminən 30 fazidir

- Qlobalda mobilin e-ticarət payı 44 təşkil edərkən , Türkiyədə bu nisbət hələ də 19 faizdir

- 2016-ci ilə görə, Türkiyədə e-ticarət əməliyyatlarının təxminən 19 faizi  ağıllı telefon və tablet üzərindən reallaşıb. 2021-ci il üçün bu nisbətin 49 faizə  çatacağı təxmin edilir

- Türkiyədə internet istifadə edən hər 3 nəfərdən yalnız biri onlayn alış-veriş edir

- İstehlakçılar məhsul araşdırmalarını mobildə, satınalmaları isə daha çox masaüstündə edir

Onu da qeyd edək ki, Azərbaycanda elektron ticarət bazarının da  həcmi 2017-ci ilin yanvar-mart aylarında 10,1 milyon manat təşkil edib.

Ötən dövr ilə müqayisədə pərakəndə elektron ticarətin ümumi həcmi 1,7 dəfə artıb.

Hesabatda qeyd olunur ki, bu ilin birinci rübündə pərakəndə ticarət dövriyyəsi 7,9 milyard manat təşkil edib ki, bu da 2016-cı ilin bu dövrü ilə müqayisədə 1,6 faiz çoxdur.

Məltəm Talıbzadə