TƏDBİRLƏR

Ustam sabah səhər 9:00-dan etibarən xidmətə başlayır.

Məlumat verdiyimiz kimi, bir müddət əvvəl gənclərimiz yeni startap yaratdılar.

Yeni layihə-Ustam tətbiqetmə və ya zənglə ustaların verilən ünvana göndərilməsi və təmirə ehtiyacı olan  əşyanın qısa müddətdə və sürətli təmirini təşkil edir.

Bu gün Ramada Hotel Baku-da  Ustam layihəsinin  böyük açılış mərasimi baş tutub.

Xeberler.az-ın məlumatına görə, tədbirdə İT mütəxəssislər və digər maraqlı tərəflər iştirak edib.

Layihənin rəhbəri Murad Həsənzadə  tədbir  iştirakçılarına Ustam haqda geniş məlumat verib. O, Ustam ideyasının yaranmasından danışıb:

“Ustam layihəsinə bənzər başqa bir proqram olub. Lakin Ustam layihəsi həmin proqramın tam  təkmilləşdirilmiş formasıdır. Ustam layihəsinin hazırlıqlarına iyunun 10-dan başladıq. Layihənin komandasını formalaşdırdıq. Ustam-da hazırda 4 nəfər fəaliyyət göstəririk. Layihənin dizaynı, saytı, serveri öz komandamız tərəfindən hazırlandı”.

Layihə rəhbəri  mərasimdə ilk dəfə Ustam layihəsinin rəsmi saytını təqdim edib.

O qeyd edib ki, Ustam-ın xidmətindən  mobil tətbiq və çağrı mərkəzi vasitəsi ilə istifadə etmək mümkün olacaq.

Qeyd edək ki, Ustam-ın Android telefonlar üçün mobil tətbiqi hazırdır. Layihənin iOS istifadəçiləri üçün tətbiqinin  hazırlanması istiqamətində fəaliyyət davam edir.

Murad Həsənzadə iştirakçılara Ustam-dan istifadə qaydaları barədə geniş məlumat verib.

Layihə rəhbəri gələcək planlarını da mərasimdə açıqlayıb:

“Məqsədimiz 6-9 ay ərzində böyük şirkət olmaqdır. Bu müddətdə 12-dən çox müxtəlif kampaniyalar təşkil etməyi düşünürük. Bir ildən sonra isə respublikanın böyük rayonlarda da Ustam xidmətə başlayacaq".

Murad Həsənzadə qeyd edib ki, Ustam layihəsi yalnız yerli bazar üçün yox, həmçinin, qlobal bazarda fəaliyyət göstərmək üçün düşünülüb.

Layihə rəhbəri vurğulayıb ki, Ustam-la ölkədə bu sahədə olan işsizliyi də azaltmağa çalışacaqlar:

“Məqsədimiz, evdə yaxşı usta olub, amma özünü başqa yerdə göstərə bilməyən ustaları üzə çıxarmaqdır. Məlumdur ki, keyfiyyətli  xidmət göstərən tanınmış ustaların işləri çox olur, onların əksər vaxt işə ehtiyacı olmur. Bəzən onların köməyinə ehtiyac olanda günlərlə gözləməli  olursan. Bütün bunları nəzərə alaraq  ustaları bir yerdə toplamaq qərarına gəldik. Ustam-ın tərkibində ikinci proqram- Ustam Partner tətbiq etməyi düşünürük. Belə ki,  proqramda işə ehtiyacı olan və bu sahədə bacarığı olan ustalar  qeydiyyatdan keçəcəklər. Onlar özləri haqda informasiyaları sistemə daxil edəcəklər. Onlara uyğun münasib yerlər olan halda ustalara  uniformalar veriləcək və onlar təmirə ehtiyac olan yerə göndəriləcək. Ustam Partner 6 aydan sonra fəaliyyətə başlayacq”.

Ustam-la bağlı geniş və ətraflı yazımızı buradan oxuya bilərsiniz. 

Məltəm Talıbzadə