RƏQƏMSAL DÜNYA

Marketsand Markets analitik şirkəti dünya simsiz Wi-Fi şəbəkələri bazarı üçün həllər üzrə proqnoz hazırlayıb.

Xəbərlər-in RYTN-in rəsmi saytına istinadən verdiyi məlumata görə, ekspertlər bildirib ki, 2015-ci ildə Wi-Fi şəbəkələrinin təşkili üçün avadanlıqlar və onunla əlaqədar xidmətlər bazarının (quraşdırma, dəstək və s.) həcmi 14,8 milyard dollar, 5 ildən sonra iki dəfə artaraq 33,6 milyard dollar təşkil edəcək.

2015-2020-ci illərdə bazarda illik artımın mobil trafikin ümumi internetləşmədə çoxalması sayəsində orta hesabla 17,8 faiz olacağı gözlənilir. Asiya-Sakit okean regionunda və Cənubi Amerikada artım müvafiq olaraq 22,6 və 20,2 faiz səviyyəsində proqnozlaşdırılır.

Hesabata görə, bu il Wi-Fi aparat avadanlığı və servisləri ilə əlaqədar satışın əksər hissəsi Şimali Amerikanın payına düşəcək ki, buna da “ağıllı” qurğulardan istifadənin artması, pulsuz internetə çıxış nöqtələrinə tələbat, simsiz texnologiyalar sektoruna investisiyalar və ictimai nəqliyyatın artan populyarlığı xidmət edəcək. Bundan başqa, təhsil və tibb müəssisələri, hotellər və pərakəndə satış şəbəkələri öz töhfəsini verəcək.

Şirkətin qiymətləndirməsinə görə, ən böyük simsiz avadanlıq istehsalçıları Alcatel-Lucent, Aruba Networks (HP tərəfindən satın alınıb), Cisco, Ericsson, Juniper Networks, Motorola Solutions, Netgear və Ruckus Wireless şirkətləridir. Bazarın liderləri korporativ müştərilər, rabitə operatorları və provayderlər üçün Wi-Fi məhsul və xidmətləri təqdim edən Cisco və Juniper Networks istehsalçılarıdır.

Xeberler.az