MÜSAHİBƏ

 “Qiymətləndirmə yekunlaşdıqdan sonra isə ölkə rəhbərliyinə mövcud vəziyyətlə bağlı ətraflı hesabat təqdim olunacaq”

Bu yaxınlarda Azərbaycan Respublikası Prezidenti yanında Vətəndaşlara Xidmət və Sosial İnnovasiyalar üzrə  Dövlət Agentliyi dövlət orqanlarında elektron xidmətlərin qiymətləndirilməsi qaydalarında dəyişikliklər edilməsi haqqında açıqlama verib.
Bununla bağlı  Dövlət Agentliyinin şöbə müdiri Ceyhun Salmanov Xəbərlər-in suallarını cavablandırıb.

Müsahibəni təqdim edirik:

-Ceyhun müəllim, bir müddət öncə Vətəndaşlara Xidmət və Sosial İnnovasiyalar üzrə Dövlət Agentliyi “Dövlət orqanlarında elektron xidmətlərin təşkili və göstərilməsi üzrə qiymətləndirmə Qaydaları”nda dəyişikliklər edilməsi haqqında qərar verib. Bu zərurət nədən yaranıb?

-Ümumiyyətlə, Dövlət Agentliyinin fəaliyyəti hər sahədə daim təkmilləşmə prinsipi üzrə davam edir. Xüsusi olaraq bu sahəni götürsək keçən il olduğu kimi bu ildə qaydalarda dəyişikliklər edildi. Dəyişiklikləri zəruri edən səbəb yeni prioritetlərin yaranmasıdır. Misal olaraq, Cənab Prezidentin Fərmanına əsasən bütün xidmətlərin Elektron Reyestrinin yaradılmasını göstərmək olar. Artıq məlumatların reyestrə dolğun və düzgün daxil edilməsi əlavə bir parametr kimi qaydalara daxil edilib və orqanın qiymətləndirmə balında nəzərə alınacaq. 

-Qiymətləndirmə qaydaları hazırlanarkən hansı prinsiplər əsas götürülüb? Beynəlxalq təcrübədən yararlanmısınızmı?

 -Qiymətləndirmə qaydaları hazırlanarkən qanunçuluq, obyektivlik, şəffaflıq və peşəkarlıq prinsip kimi əsas götürülüb. Bu sahə sürətlə inkişaf etdiyi üçün daim yeni trendləri, beynəlxalq çağırışları izləmək zəruridir. Qiymətləndirmə qaydalarının birinci versiyası hazırlanan zaman bir neçə dövlətin və beynəlxalq təşkilatların bu sahədə olan təcrübəsi araşdırılaraq bizim prioritetlər nəzərə alınmaqla hazırlanıb.

-Ümumiyyətlə, konkret bir dövlət qurumu üzrə qiymətləndirmənin yekunu olaraq Dövlət Agentliyi hansı addımları atır?

-Qiymətləndirmə 3 mərhələdə həyata keçirilir: məlumatların toplanması, toplanmış məlumatların sistemləşdirilməsi və təhlili, arayış və hesabatların hazırlanması. Məlumatların toplanılması mərhələsində dövlət orqanları ilə mütəmadi müzakirələr aparılır, informasiya resursları üzərindən xidmətlərin test edilir və xidmətlərin vətəndaşlara görsənməyən arxa tərəfdə necə təşkilinin qiymətləndirilməsi məqsədilə yerində baxış həyata keçirilir.

Prosesin yekunu olaraq hər dövlət qurumuna xidmətlərin göstərilməsi ilə bağlı çatışmazlıqları və bu çatışmazlıqların aradan qaldırılması üçün atılmalı olan addımları özündə ehtiva edən arayışlar göndərilir. Növbəti il çatışmazlıqların aradan qaldırılması ilə bağlı vəziyyət yenidən yoxlanılır və həmin ilin arayışına daxil edilir.

- Qiymətləndirmənin yekunu olaraq sizdən narazı qalan qurumlar olurmu?

-Daha doğru vurğulasaq narazı qalan yox, bəzi hallarda qiymətləndirmə nəticələri ilə bağlı anlaşılmazlıq halları ilə rastlaşırıq ki, bu hallarda həmin qurumların əməkdaşlarına nəticənin aşağı olma səbəbləri ətraflı izah olunur və o halların aradan qaldırılması üçün təkliflər verilir. Qeyd etməliyəm ki, hər il biz bu sahədə inkişafın şahidi oluruq. Qurumlar tərəfindən bizim təkliflər müsbət qiymətləndirilir və təkliflərin həyat keçirilməsi sahəsində konkret addımlar atılır. Hətta bir çox qurumlar qiymətləndirmə dövrü başlamamışdan qabaq bizim işçi qurupunun üzvləri ilə əlaqə saxlayır və xidmətlərin təkmilləşməsi istiqamətində metodiki tövsiyələr alır. Bu sahədə komanda işinin qurulması inkişaf üçün çox vacib haldır.

- Siz son dövrlərdə  daha vacib olan hansısa bir xidmətin elektron formaya keçirilməsi haqqında hansısa dövlət qurumuna təkliflər vermisinizmi ?

-Qiymətləndirmə zamanı xidmətlərin nəticələrinin elektron təqdim edilməsi və qurumların adiyyəti informasiya sistemləri arasında inteqrasiyanın olmaması ümumi bir çatışmazlıq kimi müəyyən edilir. Bu sahədə Dövlət Agentliyi tərəfindən mütəmadi işlər aparılır. Buna misal olaraq, informasiya sistemlərində fərdi identifikasiya nömrələrinin (FİN) tətbiqi və FİN əsasında əlaqələndirilməsi və bütün növ lisenziyaların elektron alınmasını təmin edən Elektron Lisenziya Sistemi Konsepsiyasını göstərmək olar. Onu da qeyd edim ki, bu Konsepsiyalar rəy və təkliflərin alınması üçün aidiyyəti qurumlara göndərilib.

- Hansısa bir dövlət qurumu xidmətini elektron formaya keçirmək istəyir. Lakin bu xidmət digər bir qurumun xidməti ilə bağlıdır və bu səbəbdən də elektron formaya keçirilmə baş tutmur. Belə halda siz qiymətləndirilməni necə aparırsınız?

-Hər hansı xidmətin elektronlaşmasının başqa qurumun xidməti səbəbindən mümkün olmaması praktikada tam olaraq qarşımıza çıxan hal deyil. Bu kimi hallar təqdim ediləcək sənədlərin başqa qurumlardan alınması və həmin qurumların sənədin verilməsini kağız daşıyıcılarda həyata keçirdikdə yaşanır ki, belə hallarda isə ən azından həmin sənədin skan olunmuş surətinin alınması imkanının təmin edilməsi ilə əsas xidmət yenə də elektronlaşdırıla bilər.

- Qiymətləndirmə prosesinə kənar, müstəqil ekspertlər cəlb edirsinizmi?

-Qiymətləndirmə prosesi işçi qrupu tərəfindən həyata keçirilir və tələbə uyğun olaraq  kənar, müstəqil ekspertlər cəlb olunur. 2013- 2014-cü illər üzrə qiymətləndirmələrdə kənar mütəxəssislərin iştirakı təmin edilib.

- Növbəti qiymətləndirmə prosesi nə zaman başlayacaq? Nə vaxt nəticələri elan etməyi planlayırsınız?

-2015-ci il üzrə tədbirlər planı artıq təsdiq edilib və Dövlət Agentliyinin rəsmi informasiya ehtiyatına yerləşdirilib. Qeyd etdiyim kimi, Dövlət Agentliyi haqqında Əsasnaməyə uyğun olaraq, Qiymətləndirmələrin yekunu ilə bağlı hər bir dövlət orqanına çatışmazlıqları və təklifləri əhatə edən arayışlar göndərilir. Qiymətləndirmə yekunlaşdıqdan sonra isə ölkə rəhbərliyinə mövcud vəziyyətlə bağlı ətraflı hesabat təqdim edilir. Hazırda tədbirlər planına uyğun olaraq qiymətləndirmələr davam etdirilir. Qiymətləndirmələr yekunlaşdıqdan və yekun hesabat hazırlandıqdan sonra nəticələrin açıqlanması ilə bağlı müvafiq addımlar atılacaq.

Mirvari Nəcəf