TƏHLİL

“Prezidentin son zamanlardakı rəsmi qəbullarına diqqət yetirdikdə görmək olar ki, müzakirə predmeti mütləq işğal olunmuş ərazilərin gələcək infrastrukturu ilə bağlı olur.

Xüsusən də bu müzakirələrdə işğaldan azad olunan ərazilərdə "yaşıl zona"nın yaradılması, "Ağıllı şəhər və kənd" infrastrukturunun qurulması müxtəlif xarici şirkətlərlə birgə nəzərdə tutulur”.

Xeberler.az bildirir ki, bu barədə “Multimedia” İnformasiya Sistemləri və Texnologiyaları Mərkəzinin rəhbəri Osman Gündüz bildirib:

“Artıq Yaponiya, İtaliya, Böyük Britaniya şirkətlərinin bu prosesdə işirakı gözlənilir. Görünən odur ki, yaxın zamanlarda bu sahədə çox ciddi işlər başlanacaq. Düşünürəm ki, aidiyyəti qurumlar, Nəqliyyat Rabitə Yüksək Texnologiyalar Nazirliyi (NRYTN, Vətəndaşlara Xidmət və Sosial İnnovasiyalar üzrə Dövlət Agentliyi (VXSİ) və digərləri bu sahənin inkişafı ilə əlaqəli konseptual məsələləri tez bir zamanda tamamlamalıdır.

Maraqlı tərəflərlə, xarici ekspertləri də dəvət etməklə müzakirələr aparılmalı, uğurlu təcrübələrdən istifadə olunmalıdır. Fikrimcə , "Ağıllı şəhər və kənd" infrastrukturu uzunmüddətli "Rəqəmsal Azərbaycan" konsepsiyasının bir tərkib hissəsi olmalıdır.

Odur ki, adıçəkilən qurumlar ilk öncə "Rəqəmsal Azərbaycan" konsepsiyasını ortaya qoymalıdır.

Ölkənin bütün sahələrinin, dövlət və özəl sektorun, bütövlükdə cəmiyyətin rəqəmsal transformasiyası, ölkə üzə İT-arxitektura, eGov-un və regional eGov-un gələcək inkişafı bu sənəddə öz əksini tapmalıdır”.

Ekspert hesab edir ki, ölkədə rəqəmsal transformasiya ilə bağlı ayrıca yeni mərkəzin, mümkündür ki, NRYTN və ya VXSİ Dövlət Agentliyinın mövcud strukturunda belə bir mərkəzin yaradılması, "yaşıl zona" və "Ağıllı şəhər və kənd" layihələri ilə bağlı əlaqələndirici qurumun formalaşdırılması doğru addım olar:

“Uzun illər formalaşmış hüquqi normativ baza rəqəmsal transformasiyaya və eGov tələblərinə uyğunlaşdırılmalıdır. Bu sahədə uğur qazanan ölkələrin təcrübəsinə baxanda görmək olar ki, yüzlərlə qanun və qərarlara dəyişiklik və əlavələr edilməlidir. İşğaldan azad olunmuş ərazilərin spesifik xüsusiyyətləri nəzərə alınaraq "Ağıllı şəhər və kənd" layihəsinin icra olunacağı pilot ərazilər, "ağıllı" formaya keçiriləcək prioritetlər, İT infrastruktur, toplanacaq dataların tipləri və emal mərkəzləri müəyyən olunmalıdır”.