Azərbaycan İnternet Forumunun prezidenti Osman Gündüz ölkədə internetlə bağlı prioritetlərin düzgün müəyyənləşdirilməsinin vacibliyini vurğulayıb.
Xeberler.az məlumat verir ki, ekspert sosial media hesabında paylaşım edərək bildirib ki, İnformasiya Kommunikasiya Texnologiyaları Agentliyi (İKTA) tərəfindən internet sürətinin artımı ilə bağlı açıqlanan hesabatlar müsbət məqamları əks etdirsə də, hazırkı mərhələdə əsas prioritet bu istiqamət olmamalıdır.
Onun sözlərinə görə, son illərdə Rəqəmsal İnkişaf və Nəqliyyat Nazirliyi (RİNN) və Aztelekom tərəfindən həyata keçirilən infrastruktur layihələri nəticəsində yüksək sürətli internetə çıxış problemi böyük ölçüdə həll olunub. Bu səbəbdən “internet sürətini necə artırmaq olar” sualı artıq əvvəlki qədər aktual deyil.
Osman Gündüz qeyd edib ki, hazırda istifadəçiləri daha çox narahat edən məsələlər internet xidmətlərinin qiymətinin yüksək olması, tələbata uyğun tarif seçimlərinin məhdudluğu, bəzi ərazilərdə rəqabətin zəifliyi, real sürətin vəd edilən göstəricilərlə uyğun gəlməməsi, eləcə də tez-tez baş verən kəsintilər və ümumi xidmət keyfiyyətidir.
Ekspert xüsusilə mobil internet tariflərinin artımına diqqət çəkərək bildirib ki, bu məsələ ilə bağlı İKTA tərəfindən indiyədək konkret mövqe ifadə olunmayıb.
Bundan əlavə, o vurğulayıb ki, dövlət operatoru Aztelekom minimal 25 manatlıq tarif siyasətində israr edir və istifadəçilərə alternativ seçim imkanları təqdim etmir.
Ekspertin fikrincə, mövcud şəraitdə beynəlxalq reytinqlərdə irəliləyişin təşviqinə və bu istiqamətdə xarici qurumlara vəsait ayrılmasına deyil, resursların birbaşa abonentlərin xeyrinə yönəldilməsinə ehtiyac var.
Sonda Osman Gündüz qeyd edib ki, əsas diqqət internet sürətinin artırılması yarışına deyil, ədalətli qiymətlərin formalaşdırılmasına, seçim azadlığının təmin olunmasına və xidmət keyfiyyətinin yüksəldilməsinə yönəldilməlidir.
