Prezident İlham Əliyevin iyulun 24-də imzaladığı sərəncamla ölkə ərazisində radioyayım şəbəkəsinin genişləndirilməsi üçün ayırdığı 13,7 milyon manat maliyyə vəsaitinin istifadə ediləcəyi məlum olub.
Rəqəmsal İnkişaf və Nəqliyyat Nazirliyi yanında Radio Televiziya yayımı və Peyk rabitəsi İstehsalat Birliyindən Xeberler.az-a bildirilib ki, sərəncam milli radioların regionlarda daha geniş yayımlanmasına şərait yaradacaq: “Hazırda radiolarımız əsasən paytaxt Bakıda cəmlənib. Bölgələrdə yayımların genişləndirilməsi üçün radioyayımçıların investisiya qoyuluşu tələb olunurdu ki, sözügedən sərəncamla dövlət bu istiqamətdə radioyayımçılara ciddi maliyyə dəstəyi göstərəcək. Eyni zamanda növbəti üç il ərzində istismar xərclərini də dövlət qarşılayacaq. Ayrılan vəsaitlə yayımların genişləndirilməsi üçün tələb olunan bütün işlər, o cümlədən yayım avadanlıqlarının alınıb quraşdırılması, yayım keyfiyyətinin artırılması üçün texniki işlərin yerinə yetirilməsi, enerji təminatının yaxşılaşdırılması və digər tədbirlər icra ediləcək. Radioyayım şəbəkəsinin genişləndirilməsi nəticəsində, həmçinin əhalinin milli radioya əlçatanlığı artırılacaq”.
Azərbaycan İnternet Forumun (AİF) Prezidenti Osman Gündüz isə hesab edir ki, dövlət başçısının sərəncamı ilə ayrılan vəsaitin aidiyyəti üzrə xərclənməsi İran və digər qonşu ölkələrin radiolarının da ölkəmizdə qanunsuz yayımının qarşısını almağa imkan verəcək: “Bu vəsait hesabına alınan texnologiya, avadanlıqlar imkan verəcək ki, o regionda olan vətəndaşlar öz milli radiolarımızı da dinləyə bilsin. Əvvəl bu imkan yox idi. İnsanlarımız ancaq o ölkənin radiolarına qulaq asa bilirdilər. Yeni və müasir avadanlıqların quraşdırılması həm əlçatanlığı, həm də gücü artıracaq. Bu baxımdan hesab edirəm ki, atılan addımlar doğrudur. İndiki dövrdə hansısa radiostansiyanın söndürülməsinin perspektivi yoxdur. Yəni, bunun dalınca düşməyə dəyməz. Bunu ancaq beynəlxalq normalarla tənzimləmək lazımdır. Bildiyim qədər ayrılan vəsait çərçivəsində qeyd olunan təkliflərə uyğun olaraq bütün Azərbaycan ərazisində 120 yeni FM radioyayım stansiyasının quraşdırılması, milli radio proqramların əhatə dairəsinin və keyfiyyətinin artırılması nəzərdə tutulub. Gözləmək olar ki yalnız Bakıda əlçatan olan radiolar artıq bütün ölkə üzrə yayımlanacaq".
"Güman ki, layihəni hələlik yayım infrastrukturu sahəsində inhisarçı qurum olan Teleradio İstehsalat Birliyi icra edəcək, Dövlət Radiotezliklər İdarəsi yeni tezlik resursları ayıracaq. Düşünürəm ki, bu layihə, indiki şəraitdə vətəndaşlarımıza bütün ölkə ərazisində daha çox və keyfiyyətli radio yayımı qəbul etmə imkanının yaradılması baxımından əhəmiyyətli bir addımdır. Xüsusən də, sərhəd regionlarında yaşayanlar üçün yerli radio kanallarına da əlçatanlıq təmin ediləcək. Eyni zamanda bununla yerli radio yayımı şirkətlərinin rəqabətliliyi və dayanıqlılığı güclənəcək”.
O.Gündüz İran radiolarının ölkə ərazisində yayımlanmasına da münasibət bildirib: “Bununla bağlı Beynəlxalq Telekommunikasiya İttifaqının (İTU) qayda və normaları var. Rəqəmsal İnkişaf və Nəqliyyat Nazirliyi yanında Radio Televiziya yayımı və Peyk rabitəsi İstehsalat Birliyi, İran, Ermənistan və Gürcüstan nümayəndələri bir stol arxasında oturub bunu çözməlidirlər. Yəni çıxış yolu öz sistemini gücləndirmək və beynəlxalq mexanizmləri işə salmaqdan ibarətdir”.
Ekspert həmçinin bildirir ki, dünya ölkələrində FM radiolara investisiyalar getdikcə azalır: "Artıq dövlətlər rəqəmsal yayımın genişləndirilməsində maraqlıdırlar. Çünki onlarda olan əksər avadanlıqlar da rəqəmsal radioyayımı qəbul etmək imkanına malikdir. Bizdə isə hələlik DAB dediyimiz bu imkan olmadığı üçün FM sahəsinə investisiya yatırılması indiki halda məqbuldur. Amma gələcəkdə rəqəmsal avadanlıqlar ölkəyə daha geniş ayaq açdıqca investisiyanı rəqəmsal radio infrastruktura yönəltmək daha doğru olardı”.
Xatırladaq ki, sözügedən sərəncama əsasən, Azərbaycan ərazisində radioyayım şəbəkəsinin genişləndirilməsi üçün avadanlığın alınması və quraşdırılması, eləcə də mövcud yayım stansiyalarının maddi-texniki bazasının yaxşılaşdırılması, dayanıqlı fəaliyyətinin təmin edilməsini dəstəkləyən zəruri infrastrukturun yaradılması və istismar xərclərinin maliyyələşdirilməsi məqsədilə dövlət büdcəsində nəzərdə tutulmuş Prezidentin ehtiyat fondundan Rəqəmsal İnkişaf və Nəqliyyat Nazirliyinə vəsait ayrılıb. Nazirlər Kabineti göstərilən tədbirlərin icrası ilə əlaqədar növbəti üç il ərzində istismar xərclərinin maliyyələşdirilməsi üçün tələb olunan vəsaitin müvafiq illər üzrə dövlət büdcəsi layihəsində nəzərdə tutulmasını təmin etməli, sərəncamdan irəli gələn məsələləri həll etməlidir. Maliyyə Nazirliyi isə sərəncamda göstərilən məbləğdə maliyyələşməni təmin etməlidir.
Televiziyaların reytinqini kim ölçür, necə ölçür və nəticələr ağlabatan olacaqmı?
Nazirlik inkubasiya mərkəzlərini niyə topladı? –Şərh
Windows 10-u necə sürətləndirmək olar?
Bizi idarə edən güc: Netokratiya
Tor: şəbəkənin nəzarətindən azad olmaq imkanı
Facebook müəmması
4G mobil texnologiyası niyə ləngiyir?
Rəqəmli yayım: mərkəzdən kənarda yaşayanlar nə etsin?
“Asan imzanı belə gördüm”- Azər Həsrət
Satışa çıxarılmış Azərbaycan adları