"Bir neçə gündən sonra universitetlər COP29 ilə əlaqədar olaraq distant təhsilə keçəcəklər. Distant təhsilin vacib elementlərdən biri keyfiyyətli internetdir. Şübhəsiz ki, regionlardan, kəndlərdən də distant təhsilə qoşulan tələbələr olacaq".
Xeberler.az bildirir ki, bu sözləri Azərbaycan İnternet Formunun Prezidenti, ekspert Osman Gündüz deyib.
Ekspert qeyd edib ki, RİNN ölkədə keyfiyyətli internet infrastrukturu qurmaq üçün son 2-3 ildə bir xeyli işlər görüb:
"Bütün ölkə boyu ən ucqar ərazilərdə də GPON texnologiya ilə nəhəng bir internet infrastrukturu qurub. Bu isə keyfiyyətli rəqəmsal xidmət əldə etmək baxımından mühüm əhəmiyyət kəsb edir. Amma provayderlər 15 avqust tarixdən minimal internet tariflərini 40% qaldırdığından regionlarda internetdən imtina edənlər və "şərikli internetə" keçənlər də çox oldu. Antiinhisar isə Aztelekom təbii inhisar subyektinə qarşı əsassız tarif artımı və "kartel sövdələşməsi" ittihamı üzrə iş qaldırsa da, az qala 3 ay olur ki, bunu başa çatdıra bilməyib".
Osman Gündüz qeyd edib ki, hazırda narahatlıq doğuran məsələ internetdən imtina edənlərin distant təhsil prosesinə necə qoşulacağı ilə bağlıdır.
Bu problemi kim həll edəcək, tələbələrə güzəştlər veriləcəkmi?
Universitetlər, RİNN və ETN görəsən bununla bağlı nə düşünürlər.?
Suallara cavab olaraq ekspert düşünür ki, Elm və Ali Təhsil üzrə Dövlət Agentliyi və Təhsil Fondu Aztelekom və digər provayderlərlə birlikdə tələbələrə güzəştlər üçün müəyyən addımlar ata bilərlər.
Osman Gündüz bildirib ki, yenə də hökumət distant təhsil qaydalarını təsdiqləmədən məsuliyyəti Elm və Təhsil Nazirliyinin üzərinə atıb:
"15 ildir ki təhsil haqqında qanunda distant təhsil forması nəzərdə tutulsa da, indiyədək bunu reallaşdırmaq mümkün olmayıb. Reallaşdırmaq deyəndə, hökumət özünə lazım olan zaman distant təhsilə keçir, özünün təşkil etdiyi distant təhsil sistemilə öz universitetlərimizin diplomlarını tanıyır. Amma nə universitetlərimizə imkan vermir ki distant forma üzrə tələbə qəbulu keçirsin, nə də həmin distant formada, xaricdə, Massacusetsdə, yaxud Harvardda təhsil alanın diplomlarını tanımır. Elm və Təhsil Nazirliyi son dövrlərdə qiyabi təhsili xeyli məhdudlaşdırıb, gözlənilirdi ki bunun müqabilində distant formada təhsil işə düşəcək. Bir neçə universitetdə bu sahəyə xeyli investisiya yatırıblar. Lakin təəssüf ki, distant təhsil forması rəsmiləşdirilmədiyindən bu investisiyaların geridönüşü olmadı. Universitetlərimiz də məhz bu səbəbdən bu təhsil biznesinin faydalarından bəhrələnə bilmirlər, resurslar cəlb edə bilmirlər. Hətta COP29 ərəfəsində də hökumət "öz distantına" keçməyi üstün tutdu, amma ümumi qaydaları təsdiqləmədi".
Son olaraq ekspert bildirib ki, ümumiyyətlə, məhz bununla bağlı hökumətin 15 ildə tutduğu mövqe ağlasığmazdır və heç bir ağlabatan izahı yoxdur:
"Düşünürəm ki, universitet rəhbərlərinin, Rektorlar Şurasının bununla bağlı məhkəməyə müraciət etməkdən başqa yolları qalmayıb".
