Ötən gün keçirilən Beşinci Beynəlxalq Bankçılıq Forumunda Mərkəzi Bankın İdarə heyətinin sədr müavini Alim Quliyev “2018–2020-ci illərdə Azərbaycan Respublikasında rəqəmsal ödənişlərin genişləndirilməsi üzrə Dövlət Proqramı”nın uğurla başa çatdığını bildirib.
Xeberler.az bildirir ki, məsələyə Azərbaycan İnternet Formunun Prezidenti, ekspert Osman Gündüz münasibət bildirib.
İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlı isə Forumdakı çıxışında Proqramın 70% icra edildiyini vurğulayıb.
Ekspert bildirib ki, real vəziyyət deyilənlərdən tam fərqlidir. Yuxarıda qeyd olunan fikirləri oxuduqdan sonra yenidən adı çəkilən Proqrama nəzər saldım. Proqramda nəzərdə tutulanların 70-80%-i icra edilməyib.
"A.Quliyevdən fərqli olaraq Vüsal Qasımlı proqramın bank sektorunun yenidən canlandırılması bölməsinin yalnız 54,5 faiz, rəqəmsal ekosistemin formalaşdırılması bölməsinin isə 70 faiz yerinə yetirildiyini bildirsə də, sadəcə qeyd olunan tədbirlərə nəzər salmaqla müəyyən etmək olar ki, tədbirlərin əksəriyyəti icra edilməyib.
Pandemiyanın diqtə etdiyi mühitin, stimullaşdırmanın nəticəsində kart ödənişlərində nağdsız dövriyyənin xüsusi çəkisinin artmasını, ödəniş kartları ilə aparılan ölkədaxili nağdsız ödənişlərin həcminin artmasını və Trendyol vasitəsilə e-ticarətin həcminin artmasını Proqramın icrası nəticəsində nail olunmaq kimi təqdim etmək absurd və gülüncdür.
Ölkədə maliyyə-bank sektorunun rəqəmsal transformasiyası, rəqəmsal sahibkarlığın inkişafı, beynəlxalq ödəniş sistemlərinə inteqrasiya sahəsində görüləcək işlər hədsiz çoxdur".
