Məlum olduğu kimi ali məktəblərin kompüter və İT ixtisasını seçənlər bu il ilk dəfə olaraq kimyadan deyil informatikadan imtahan verəcəklər.
Bir müddət öncə bununla bağlı Dövlət İmtahan Mərkəzi tərəfindən proqramlar təsdiqlənib, ədəbiyyatlar hazırlanıb, sual nümunələri hazırlanıb, sınaqlar keçirilib.
Xeberler.az-ın məlumatına görə, ötən gün isə DİM informatikadan imtahan tapşırıqlarının hazırlanması və onları qiymətləndirənlərin- markerlərin hazırlanması üçün növbəti hazırlıq tədbiri təşkil edilib.
Hibrid formatda keçirilən bu tədbirə DİM bütün ölkə üzrə müəllimləri, metodistləri və pedaqoji profilli sonuncu kurs tələbələri və magistrləri cəlb edib.
Hazırlıq tədbirində informatika kurrikulumu əsas götürülməklə təqdim edilən tapşırıqların təhlilləri aparılıb. Bu hazırlıq kursundan sonra iştirakçlar imtahan verməlidir və onun nəticəsindən asılı olaraq onlara marker statusunun, necə deyərlər “bunker müəllimi” statusunun verilməsi nəzərdə tutulub.
