Xeberler.az olaraq, bir neçə gün öncə Təhsil Nazirliyinin Təhsil Sisteminin İnformasiyalaşdırılması idarəsinin rəhbəri Vüsal Xanlarov təhsildə rəqəmsal transformasiya ilə bağlı
müsahibəsini təqdim etmişdik.
Məsələyə Azərbaycan İnternet Formunun Prezidenti, ekspert Osman Gündüz münasibət bildirib:
"Müsahibədən görsənir ki, bizim təhsil sistemində hazırda bir xeyli rəqəmsal layihələr reallaşdırılır.
Müsahibədə, bir müddət öncə Təhsil naziri Emin Əmrullayevin də bu haqda vurğuladığı bir məqam diqqətimi çəkdi:
“2021-2022-ci tədris ilində " Rəqəmsal Bacarıqlar " layihəsi ölkəmizin 16 şəhər və rayonunu əhatə edəcək.
Builki plan üzrə layihəyə 250 məktəbdən 190 min şagirdin cəlb olunacağı gözlənilir. Tədris prosesində ümumi olaraq 1500 nəfərdən çox müəllim heyətinin iştirakı nəzərdə tutulub. Layihə şagirdlərin proqramlaşdırma və alqoritmik biliklərinin artırılması ilə yanaşı, məqsədyönlü və məntiqi düşüncə tərzinə malik şəxslər kimi formalaşmasında böyük əhəmiyyət daşıyır.”
Ekspert qeyd edib ki, informatikanın yeni metodla tədrisinə əsaslanan "Rəqəmsal bacarıqlar" layihəsi artıq 4-5 il olar ki reallaşır. Yəni, görünən odur ki, Təhsil Nazirliyi bu işlərə ciddi resurslar yatırır.
"Xatırladıram ki, bir il önçə Təhsil Nazirliyi BP-nin dəstəyi ilə də informatikanın tədrisinin təkmilləşdirilməsi layihəsinə də start vermişdi.
Eyni zamanda Təhsil Nazirliyi informatikanın tədrisinin yaxşılaşdırılması ilə bağlı da son illər bir sıra uğurlu addımlar atıb. MİQ əsasında informatika müəllimlərinin də keyfiyyət tərkibi xeyli yaxşılaşıb
NRYTN da məktəb yaşlı uşaqların rəqəmsal bacarıqlarının artırılması üçün böyük bir Mərkəz formalaşdırıb, Universitetlərlə əlaqələr güclənib. Təhsil Nazirliyi Universitetlərdə, o cümlədən AzTU-da kodlaşdırma ilə bağlı bir neçə sinif formalaşdırıb.
Əlavə olaraq da qeyd edim ki, ötən illərdə hökumət İKT yönümlü ixtisasların təsnifatını xeyli təkmilləşdirib.
Yeni İT ixtisaslar, mexatronika və robototexnika, radiotexnika, aerokosmik, elektronika və telekommunikasiya mühəndisliyi və s. bu kimi ixtisaslar var.
Yəni, görünən odur ki, bir tərəfdə hökumət, Təhsil Nazirliyi, NRYTN rəqəmsallaşma və informatikanın tədrisinin təkmilləşdirilməsi, informatika müəllimlərinin keyfiyyət tərkibinin yaxşılaşdırılması, rəqəmsal bacarıqların artırılması və nəhayət İT və kompüter yönümlü ixtisasların yaradılması istiqamətində ciddi işlər aparır. Bura büdcədən və digər mənbələrdən yatırımlar edilir".
Osman Gündüzün sözlərinə görə, Amma, hökumətin digər qurumu, DİM, informatikanın, rəqəmsal bacarıqların elə məktəbdəcə məhv edilməsi istiqamətində addımları davam etdirir.
"Yuxarıda sadalanan rəqəmsal layihələrə, rəqəmsal transformasiya işlərinə baxmayaraq indiyədək də DİM İT və kompüter ixtisaslarını, riyaziyyat və digər texniki ixtisasları seçənlərdən İnformatika əvəzinə Kimya imtahanı götürür. Texniki-texnoloji itiqaməti seçənlərin zorən kimyalaşması aparılır.
Təsəvvür edin ki, absurd bir vəziyyət uzun illərdir davam edir, riyaziyyatı seçən kimyadan imtahan verməlidir. Bu problemlə bağlı çox yazılıb, çox deyilib.
Bu il Prezidentin fərmanı ilə NRYTN tərəfindən rəqəmsal transformasiya ilə bağlı konseptual sənəd hazırlanmalıdır. Bildiyim qədər bu istiqmətdə işlər yekunlaşmaq üzrədir. Fikrimcə rəqəmsallama və innovasiyaların inkişafına cavab verən dövlət qurumalrı da bu problemin fərqində olmalıdır.
Ümid edirəm hökumət, NRYTN, ASAN, Təhsil Nazirliyi, İT ixtisas verən universitet rəhbərləri indidən yığışıb bu məsələni müzakirə edərək növbəti qəbulda “Zorən kimya, yoxsa İnformatiaka” problemini həll edə biləcək".
