TƏHLİL

2 il bundan öncə NRYTN yanında İT-nin inkişafı Dövlət Fondu və Texnopark ləğv edilərək onun əsasında İnnovasiya Agentliyi yaradılıb.

Rəhbəri təyin edilib, Əsasnaməsi, büdcəsi təsdiqlənib. Vacib məqam ondan ibarətdir ki, bütün bunlar Prezident Fərmanı ilə təsdiqlənib. Agentliyin əsas məqsədi də məhz startaplara dəstək vermək, qrant, kredit və investisiya yatırmaqdan ibarət olmalıdır.
Bildiyim qədərilə Agentliyin kapitalında əl dəyilməyən 20-30 milyon manat vəsait də var.

Görəsən ötən 2 il müddətində Agentlik bu vəsaitdən nə qədər qrant ayırdı, nə qədər kredit və investisiya yatırdı?

Təəssüfki bu sahədə hər hansı fəaliyyət gözə çarpmır.

Əksinə, dəstək üçün Agentliyə müraciət edənlərə bildirilir ki, Nazirlik tərəfindən Agentlik üçün zəruri proseduralar təsdiqlənmədiyindən hər hansı ciddi dəstəkdən söhbət gedə bilməz.

Nazirlik isə uzun müddətdir ki, bu proseduraları təsdiqləməyə tələsmir.

Bəs görəsən Nazirlik nə üçün Prezident Fərmanı ilə yaradılan qurumu inkişaf etdirib onun xətti ilə ekosistemə dəstək vermir, əvəzində yeni bir Fond yaratmağı nəzərdə tutur ?

Bu sualın cavabı mənim üçün də maraqlıdır.

İT ictimaiyyət üçün sirr deyil ki, NRYTN -da bəzi məsul şəxslərin, ümumiyyətlə Nazirliyin Agentliklə münasibətləri çox soyuqdur. Mənasız çəkişmələrin, ziddiyyətlərin olması ilə bağlı məlumatlar da arada sızır.

Amma maraqlıdır ki, doğurdanmı Nazirlik bu cür mənasız intriqalara görə Prezident Fərmanı ilə yaradılan bir strukturu kənara atıb, əvəzində yeni bir Fond yaratmaq istəyir.

Doğurdanmı Nazirlik ekosistemin inkişafını kimlərinsə şəxsi maraqlarına qurban vermək istəyir.

Pandemiya ilə əlaqəli ölkədə bəzi vacib sektorlarda çətinliklər yarandığı, ölkənin inkisaf potensialını gücləndirmək üçün yeni innovativ həllərin yaradılmasına diqqət yetirməyin çox vacib olduğu indiki zamanda Nazirlik rəsmisinin mənasız tədbirlərdə bu tip açıqlamaları təəssüf doğurur.

Ümid edirəm aidiyyatı qurumlar, cavabdeh şəxslər bu məsələyə diqqət yetirəcəklər".

Azərbaycan İnternet Formunun Prezidenti Osman Gündüz