AZNET

“Teknofest”də diqqət çəkən məqamlardan daha birisi də ölkənin İT biznesinin, texnologiya şirkətlərinin burada iştirak etməməsi oldu.

Xeberler.az məlumat verir ki, bu barədə Azərbaycan İnternet Forumunun Prezidenti,ekspert Osman Gündüz “Facebook”da paylaşıb.

“Türkiyədən çoxsaylı texnoloji şirkətlər festivala qatıldığı halda, hətta dronları min kilometrlərlə yol qət edərək festivala qatıldığı halda   bizim özəl biznes burada iştirak etmirdi.

Özəllərdən yalnız “İDRAK” şirkəti və “A2Z” gözə dəyirdi və aktiv iştirak edirdilər.Vəssalam.

Azərbaycan tərəfdən iştirakçılar arasında dövlətin xüsusi çəkisinin yüksək olması, dövlət qurumları və dövlət şirkətlərinin üstün mövqeyi diqqət cəlb edirdi. Hansı ki, bəlkə də tərsinə olmalı idi.

Ən maraqlı məqam isə odur ki, hətta əsas təşkilatçı olan RİNN-lə əməkdaşlıq edən, onların hesabına yetərincə pul qazanan İT şirkətlər, festivalın əsas tərəfdaşı olan ASAN-ın AZİNTEX konsorsiumuna daxil olan , əsasən dövlət sifarişlərinin üzərində "oturan" texnoloji şirkətlərimiz də bu cür əhəmiyyətli tədbirə qatılmamışdılar.

Amma bununla belə, onlar uzun illər, “Teknofest”lə müqayisə oluna bilməyən və daha az əhəmiyyət kəsb edən BakuTel-ə yüz minlərlə yerpulu xərcləyiblər.

Ümid edirəm, təşkilatçılar, cavabdeh qurumlar, dövlət sifarişlərini İT şirkətlərə yönəldənlər bunun fərqində olacaqlar.”