"Son günlər bizim İT şirkətlərimiz dövlət qurumları ilə ardıcıl görüşlər keçirirlər. Maraqla izləyirəm. Ki, görüm nə perspektiv vəd olunur, hansı əlavə dəyərlər yaradacaqlar, dayanıqlı inkişaf, innovasiyalar və ekosistem üçün nələr olacaq.
Amma görüşlə bağlı məlumatlardan belə qənaətə gəlmək olur ki, yenə də bizim İT şirkətlərimizin yeganə ümid yeri dövlət sifarişləridir. Əgər tenderlər dayandırılsa, devalvasiya zamanı olduğu kimi dövlət sifarişləri kəsilsə bizim İT şirkətlər yenə batacaq və əvvəlki kimi kütləvi ixtisarlar qaçılmaz olacaq. Və bununla da bizim İT mütəxəssislərin xaricə 2-ci köçü başlanacaq.
Son zamanlar dövlət başçısı öz çıxışlarında özəl sektorun da məsuliyyətinin artırılmasına, innovasiyaların və ekosistemin inkişafına, tenderlərin keçirilməsində şəffaflığın artırılmasına ciddi diqqət yetirib. Lakin müşahidələr göstərir ki, İT sektorda əsas mübarizə məhdud dövlət sifarişlərinin əldə olunmasına yönəlib, tenderlər uğrunda az sayda İT şirkətlər arasında amansız mübarizə gedir. Əksər İT şirkətlər dəyər yaratmağa, xarici bazarlara çıxmağa üstünlük vermirlər.
Son zamanlar yalnız BestComp və SİNAM şirkətinin xarici bazarlara daxil olmaq sahəsində uğurlu fəaliyyəti diqqət cəlb edib. Prezidentin rəqəmsal hökumətə keçidlə bağlı fərmanında nəzərdə tutulduğu kimi dövlət sifarişləri ilə bağlı ciddi kordinasiya olmalıdır, İT layihələrin dəyərləndirilməsi və prioritetliyi təmin edilməlidir, təkrarçılığın qarşısı alınmalı, normal ekspertiza mexanizmləri hazırlanmalıdır. Bəzən hətta ləğv edilən tenderləri udan, milyonlarla vəsait hesabına realda mövcud olmayan rəqəmsal dövlət resursları “hazırlayan” İT şirkətlərimizin də olduğunu görürük.
Hədsiz böyük dövlət resursları qarşılığında İT şirkətlərimizin təqdim etdiyi həllər bir çox halda yarıtmaz vəziyyətdə olur. eSatınalma Portalına diqqət yetirdikdə hər şey açıq-aşkar görünür. İT şirkətlərimizin növbəti görüş yeri güman ki, İqtisadiyyat Nazirliyi olacaq.
Bununla bağlı qabaqcadan bu quruma təklifim var.
Yaxşi olardı ki, bizim İT şirkətlərimiz Nazirin yanına gəlməzdən öncə Nazilriyin əməkdaşları xarici təcrübə ilə bağlı bir təqdimat hazırlasınlar.
Təqdimata qonşu ölkələrdə, Kazaxstanda, Ermənistanda, Ukraynada mövcud olan İT şirkətlərin yaratdıqları əlavə dəyərlər, onların milyonlarla xarici investisya əldə edən startapları, dövlətdən deyil, xaricdən aldıqları milyonlarla investisiyalar haqqında məlumatlar daxil edilsin.
Əminnəm ki, İN-nin peşəkarları belə bir təqdimatı hazırlaya biləcəklər və bizim İT “nəhənglərimiz” üçün də bu maraqlı olacaq".
Azərbaycan İnternet Formunun Prezidenti Osman Gündüz
